U kyrtong ka Congress na Mowkaiaw u Nehemayah Tyngkan hawa e yei klam ha ka yalang paidbah ha Barato wa da pynman ha ka 21 tarik, da ong u wa hanla rem u ya ka Election MLA ha u 2018 tangwa ym em u randien u wow kreh neibynta ki paidbah ki chnong ha ka Constituency.
Da ong u wa i daw wa pynman ya oo wow yakhun u ya kani ka Election toh wa da yoo u yeiwa chah lehbeiñ ki paidbah ha ka sorkar MDA ka UDP wa NPP wei da rai u wow tia bait chaphrang.
U Nehemayah da kynmoo u ya i por wa wan ka khlam COVID-19 heiwa da pynkylla ya i por syndet syndet wa wai yaaw neibynta ki warep na ka thaaiñ wei em ka sngi wa da chah ksoh ki ha Soomer wei manda tip u yeini da lai u ha ini i thaw wei da yaklam u wa u DC heiwa da ong u wa lada ym chah ya ki warep wow hiar cha Jowai yi wow bahkhlieh ya ki mar rep wei hadien ini wan ki heh pulit wei manda kylli ki yei pyrtuid u wut-wut pynlait ki ya ki warep wei heitæ i por em kawi ka manbei na Mukhap kawa da kdung wow e khublei ya oo neibhah wot 7 sien Phone ki cha u MLA tangwa ym yoh jubab.
Da ong u wa yong wa da kha ya oo ha u chylliah wei ynmtoh ha u tusok, da kynmoo u yei eh i khor wa chem ki paidbah wei da kynmoo u leh sa iwi iwa jia heipor Lockdown heiwa da ong u ya u DC wa u BDO wow wai ya ki yaaw ha ki madan yalehbol wei wow thaw i jngai iwi na kiwi kiwa chongdai khnang wow im ki khon ka Mowkaiaw Constituency wei manda thoh leh ya ki chithi ym em wa ap neibhah wa ymtoh oo u MLA deiwa kyntu ya ki paidbah wow pynman ya oo kam u MLA yow yoo ki ya ki kaam.
Da beiñ u leh ya kani ka sorkar heiyatoh wa ka High Level kawa yoobeiñ ya ki khian ki dai deiwa e nongmuna ya kiwa kit chyiap katni toh du kiwa em kari Dumper wa 12-14 chaka iwa pynyoo che wa pynlai kiwa heh spah ya kiwa khian.
Da kyntu u leh yei kyrchaan ki paidbah heiwa khnang manda poi u ha ka thong emkaam u chna ya ka Zonal Development Committee hadien wa jop u ha ka 2 tarik Wisu 2023 wow wanrah ya ki kaam pynroi katkam i emkaam ha ki chnong wa em ha jar jiar ki chnong kiwa haap hapoh ka Zone.
Heijooh i por heiyatoh wa ka poisa wa tyrwa ki kyrtong na kiwi ki Party, da ong u wa heiyatoh wa ka poisa su pdiang ka tangwa kat ya ka Vote u chong ymtoh na ka poisa tangwa ka kti wow nioñ ha ka chaap wow ye u wow kreh ya ka mynried ka jaitbru.
Chooh chooh da ong u wa ym em poisa u wow su ya ki bru kam ki dor dieñ wei ha ki sngi wow wan daw wan ka poisa ki kyrtong heh spah wei e khublei ya ki ya ka poisa wei wow kyrtem ya ka poisa boi em ske, em taro em thlen ko tangwa ham pynsepai ya ka Vote cha ki kyrtong ki wow pynkhai biang ya kani ka poisa wa e ki.
