Hadien wa em kiwa pynpoor ya iwi i Video wa da kam wa u kyrtong ka NPP na 3-Raliang Constituency, u Comingone Ymbon da lai yachem u wa u kyrtong ka PDF na kani hi ka jooh ka Constituency, u Shemhok Garod heiwa neiliang u Comingone da dep u wow ujor FIR pyrchah ya kini ki bru wa pynpoor ya kani ka Video wa thok wa da yahbakla ya ki paidbah.
Neiliang u Shemhok da pyntip u wa oo leh da dep lai ujor FIR u ha ka 22 tarik uni u bnai ha Jowai Police Station deiwa pynbaad ya u bru wa tip kam u Thij Biam uwa na ka chnong Nangbah uwa da pynchna (Edit) ya ini i Video wei da pynpoor u ki lyngba u WhatsApp.
U Shemhok da ong u wa ki bru wa da mih ha ini i Video toh kiwa kyrchaan yong oo wei katu ka Bolero toh kawa em kiwa kyrchaan yong oo kiwa lai baam ja chapoh kseh ym toh wa oo wa yachem wa u kyrtong ka NPP neibhah ha katai ka sngi oo em u ha Kyndongtuber yow lai yalap Election cha yung ki bru wei da em u ha ka yalang yalap Election hadooh 5:00 waje i janmiet wei hadien ini da lai biang wow yalap Election deiwa psiah cha ki yung bru hadooh 10:00 waje i miet.
Chooh chooh u Shemhok da ong u leh wa u bru wa da klam da batai ha ini i Video toh u Thij Biam uwa man leh u payu arbei yong u Lakhon Biam, u kyrtong ka BJP na 3-Raliang Constituency uwa da kwah wow pyndooh mynsien ya kiwa thap Vote ka 3-Raliang Constituency wei kamjooh ya kiwa kyrchaan yong oo deiwa pynpoor ya kani ka khubor yow ong bait wa u Shemhok toh uwa pynyieñ da u Comingone.
Da pyntip leh wa ka kari wa da pynemkaam ki wow riñ ya ini i Video wa em ya u Number ML-04C-4458 toh ka yong ka Shar Biam kawa dang emyatoh u Lakhon Biam.
Ya ini da khana u Shemhok hadien ka yalang Election wa da pynman u ha Thadmuthlong ynne ka sngi deiwa kyntu leh ya ki paidbah wym toh u chah pynbiej wei wow bichaar deimiat ya ini wa pyrchang wow pynsih yei pyrtuid u wei da yooluti u wa lyngba ka aiñ daw takit bniah khnang wa neini chaphrang ym jia de kam kini ki khubor thok deiwa pynchitom ya kiwa emkti.
Puræ leh: Ujor u Comingone pyrchah ya kiwa chna wei pynpoor ya i Video thok
