U kyrtong ka UDP na 2-Jowai Constituency, u Moonlight Parait da pynche u yei chah pynbaad u ha u Dr. RC Laloo hawa e u yei klam ha ka yalang paidbah u Andrew Shullai wa da pynman ha Ladthadlaboh ha ka miet ka 24 tarik uni u bnai heiwa u Dr. RC Laloo uwa da ong wa u Moonlight da dep klam u ha kawi ka manbei wym yaleh Election de u wei lada yaleh u leh u yaleh pynrem donhi.
Hajrong ini, u Moonlight da pynche u deiwa ong ya u Dr. RC Laloo wow e ka sabut heiyatoh wa kattæ ka manbei deiwa e dei thoh lane ki dur ki dar wa pynyoo yeini iwa klam u ya kini ki kyntien khnang yow pynsakhiat yeini i thok u Dr. RC Laloo.
Da ong u leh wa u Dr. RC Laloo ha kini ki sngi da im u du hei thok i jlær neibhah nadooh u 2003 wa rem u ha u tynde u Singh Mulieh wei ha u 2004 heipor wa dang man u kam u CEM ka JHADC, u Dr. RC Laloo da phah khut u ya oo wow pynman ya ka yalang ka Jowai Block Congress Committee heipor wa dang emlang ki ha ka Congress heiwa ha kani ka yalang da em kamwa 50 ngut ki dkhot ka Jowai Block Congress Committee deilang wa u President ka MPCC ha itu i por u Salseng C Marak heiwa u Dr. RC Laloo da pynbna u wa ym yaleh Election de u.
“Da kdaw u Dr. RC Laloo ya ka pariam kti u cha nga, wei nga da ong O ham pu rai dang katni neibhah manda poi i por daw kwah mi u yaleh biang tangwa da jubab u wa nga da heh O, chisien da rai da rai,” khana u Moonlight.
Da khana u leh wa manda kylli u Salseng ileh jhan mi u rai, u Dr. RC Laloo da jubab u wa chisien da rai da rai, kamtæ u Moonlight da sñiawphylla u wa kat u Dr. RC. Laloo, u bru wa em burom da wan thok u hakhmat ka pyrkthai wa u Moonlight yaleh Election du wow yaleh pynrem donhi.
U Moonlight da pynkynmoo u leh ya iwa da dep klam u Dr. RC Laloo uwa da ong ya u Andrew Shullai wa lada hap wow mih na ka Congress bha wow dam u yaleh Election tangwa ha u 2022 ong u hakhmat ki paidbah hoi i u ya kyrchaan TMC,.
“U Dr. RC Laloo katni ka kjat u chiliang em ko ha Congress chiliang em ko ha ka TMC wei heijooh i por ksoh u yei kyrdan Chiarman Disciplinary Committee yong ka Congress wei i kaam u toh wa kiwon kiwon kiwa leh tam oo wow pam wow ah pyrtuid ki tangwa pyn da oo wa tyngkheiñ ya ka aiñ yaleh pyrchah ya ka Party,” da ong u Moonlight.
Kamtæ u Moonlight da kylli u wa lada dang ye u chaniah ya kam uni u bru uwa da ong ya u Andrew lada ym toh u yaleh Election na ka Congress ham yaleh de tangwa katni won yah u ya oo cha ka TMC.
Chooh chooh u Moonlight da ong u wa u Dr. RC Laloo ym chong de u ha Jowai, ym pyrkhat de u ya ka 2-Jowai Constituency, pyrkhat u ya ka Business yong oo kawa yatoh waka karkhana pynmih khyndaw bilat yong oo neibhah wa em ka Subsidy wa e lynbga u Montri wa ksoh ya ka chnat Industry wei ki paidbah kiwa tip uyi oo uni u Montri daw tip ki kayi ka emyatoh ki heiyatoh wa i myntoi samen neibhah ha ka Election wa dep, u Andrew Shullai da ong u wa pynman blang kñia ki oo, neibhah wa ngiat hi-eh ki oo yow pra ka Vote Jowai yow jop da uwa da thmu da mut ki wei katæ toh ka thong yong ki.
Kamtæ u Moonlight da kyntu u ya ki paidbah wym toh u ap ya kitu ki kyntien thok chukor u Dr. RC Laloo dei wym poi pyrkhat wa kat dei rynyieñ u wow lai thok lai chukor u ya ki paidbah ka 2-Jowai Constituency.
