U kyrtong ka UDP na 2-Jowai Constituency da ujor FIR u ha Jowai Police Station hadien wa em uwa pynpoor ya ka khubor thok ha ki Social Media chaphang yong oo kawa yatoh wei yieñ yaleh Election MLA u ha kani ka kynti.
U Moonlight da pyntip u wa ki pulit da yoh ki wow takit ya uwa leh yeini wei da phah wan hajir ya oo cha Police Station wei hei takit ki pulit ya uni da phla u wa da thoh u yeiwa thoh u deiwa leh chongchit wei da pynpoor u ki kylleiñ kylleiñ.
Hawa khut won ki pulit ya u Moonlight ynne cha Police Station, uni uwa leh yeini uwa na Panaliar, Jowai uwa man kam u pulit ka 3rd Battalion da paan maap u kamtæ deiwa pyrkhat wym kwah u chah ktah i kreh uni u bru yow lait u nei chah beh kreh yow lait u chah ktah ki khon u kiwa em 6 ngut, neiliang u Moonlight da maap u oo wei da pyndam u leh ya ka ujor deiwa pynrap wa ym kwah i wow chah ktah ki khynroo i neibhah wa kreh neibynta wow pynyoh kreh ya ki khynroo.
U Moonlight ong u wa kini ki jait khubor thok kiwa kam kini ktah bait ki ya oo kam u kyrtong wei ym yohsa de u khlem da e da ka FIR yow tip tre kiyi wa leh yeini neibhah ki paidbah leh ym kwah ki wow jia kam ini pynbaad ya i wym jooh em leh wei ha ki 11 tylli ki Election wa da leh u ym jooh em paan poisa u na kiwon kiwon da leh u katkam i bor yong oo wei katkam ka kamai kajih.
Da ong u leh wa hadien wa da dep u wow pynche paidbah wei da ini wa paan maap uni uwa leh yeini daw sñiawthooh chooh chooh ki bru.
Neiliang won uwa emkti wow leh ya ini i kaam uwa da wan emlang leh ha Jowai Police Station ynne i step, da ong u wa da pynpoor u ya ini i dur ha WhatsApp Group ka TMC Panaliar neibynta wow pyntlot ya u Moonlight Pariat wei da leh u yeini ha ka 24 tarik uni u bnai wei da wan u wow paan maap na u Moonlight Pariat kamjooh na ki paidbah ka 2-Jowai Constituency wa ya ki paidbah u Moonlight Pariat wym hoi u sñiawpær ki ya ini i leh bakla yong oo.
Kamtæ e ngooh u ya u Moonlight Pariat wa da maap u yeini wa da leh bakla u.
