Ynne ka 27 tarik kawa man ka sngi wa da e mon laitlooid ya ki paidbah wow mih ki cha ki thaw thap Vote namo ki Polling Station neibynta u jied ya kiwa mihkhmat wow yasaaid ha ka yung dorbar chna aiñ ka jylla, neiliang u Wyrta hei lailuti u ha East wa West Jaiñtia Hills District da yoh leh wow yaklam wa ki khon khynroo khyllood kiwa wan thap Vote hei sien wa nyngkong heiwa kini ki khynroo khyllood da pynsñiaw ki yei sñiawkmen wow yoh u chimbynta u jied ya u lane ka wa mihkhmat dei mon yong ki hi katkam i yootoh yoobiang ki.
Kawi napyrdi kini ki khyllood da khana ko ym yohthiah de ko hei miet ka 26 tarik neidaw wa kmen wei jhan ko u che noh khnang yow yoh u thap Vote hei sien wa nyngkong hei im yong ka, kamtæ da lai mih ko leh dang step cha ka Polling Station wei ka toh kawa yoh u thap Vote nyngkong dooh ha kani ka Polling Station wa em ha Rymbai.
Chooh chooh da ong haroh ki wa kam ki khynroo khyllood man ki ka mynried yong ka pateiñ wow wan wei angnood ki wow yoh da kiwa mihkhmat ki wow synchaar hok, ki wow wanrah yei roi i paar wei kamjooh leh u pait ki yei eh yong ki manbei manpa wa ki khon khynroo khyllood.
Kwah ki leh wow yoh ya kiwa mihkhmat kiwa ye wow pait yei emkaam yong ki kam ki khynroo nadooh i yoh kaam yoh jaam yow yoh kreh da kiwa toh hok u yoh kiwa da biang ka puræ puthi wei wow kylla ka chnong ka thaw.
Uwi na kini ki khynroo wa dang thap Vote hei sien wa nyngkong ha Jowai, da kyntu u ya ki paidbah wow jied ya uwa mihkhmat wa tip wa stat uwa ye u pyndep yei kaam, ymtoh uwa kut du hei kular.
Kwah ki leh wow yoh ya uwa mihkhmat wa tip wow wanrah ya ka roi ka paar, uwa tip wa stat uwa chemphang wei ym phær lada jop da kawon kawon ka Party tangwa emkaam wow pyrkhat u ya ka Constituency waroh kawi, uwa ye u chana jngai neibhah boon ki por ym jooh poi thaw ki ym du neibynta ki khynroo khyllood kamjooh leh ki manbei manpa.
Kawi won da ong ko wa emkaam wow kreh chitom wei wow kreh u neibynta ki paidbah kamwa sñiaw u yei emkaam yong oo samen.
