I thap Vote yow jied ya ki MLA wa thymme cha ka yung dorbar chna aiñ wa khatwi yong ka jylla da kut noh i ynne ka sngi heipor 4:00 waje i janmiet, heiwa palat 21 lak ngut kiwa chong chnong kiwa da yoh yei hok wow jied daw rai ya ki 59 ngut kiwa mihkhmat ka jylla.
Ki kyrtong kiwa da e reiñ ha kani ka Election na ki seiñ waphær waphær em ki waroh 369 ngut, hadien wa da pynsangeh noh chwa ya ka Election ha Sohïong Constituency.
U Chief Electoral Officer (CEO) ka jylla, u Frederick R Kharkongor da pyntip u wa i wan kiwa thap Vote ynne hadooh 5:00 waje i janmiet man ko 75% wei ye ko wow ku chooh chooh hadien wa da yoh lut yei yukheiñ neibhah ki thaw wa rap jngai ym pu em u yoh yukheiñ lut.
Ha ka Election kawa katni, ki kynthai da tam ki ya ki chynrang kiwa wan thap Vote hanla dang em kiwa dang sah ki wym pu em yoh yukheiñ.
Da khana u wa ka thap Vote da lai bait ha waroh kawi ka jylla, lait noh wa em i thut wa malu mala ha ki kor ha ki kattu katni ki Polling Station ya kiwa da ye wow pynbait.
Ha iwi won i liang, u Kharkongor da khana u leh wa em i pynthut ha ki 6 tylli ki Polling Station wa haap ha Mawhati Constituency, kiwa em ha ki thaw khappood wa ka Assam, tangwa ya ini i kaam leh da ye wow pynbait deiwa tuklar wei ya krehlang ki bor ka sorkar Assam wa yong ka jylla Meghalaya.
Ha kani ka sngi da saam leh da ki Medal ha waroh ki Polling Station cha ki 5 ngut kiwa wan smat dooh wow thap Vote wa cha kitu kiwa dang dep dap 18 snem kiwa thap Vote hei sien nyngkong wei kiwa wan nyngkong dooh.
Hadooh 5:00 waje katkam ka yukheiñ wa da yoh da em ar tylli ki Polling Station wa poi 90% kiwa thap Vote kitæ ka 30-Mariang Constituency (90.4%) waka 31-Mawthadraishan Constituency (90.1%). Kiwa da kynjoh 90% won toh ka 7-Amalarem Constituency kawa yoh 89.82% wa ka 4-Mowkaiaw Constituency 88.78%.
