U Conrad K Sangma hawa yaklam wa kiwa thoh khubor ynne ka sngi hadien wa da dep chong yalang wa ki seiñ saiñpyrthai wow embynta ha ka sorkar wa thymme, da khana u wa nyngkong da rai wow e pyrtuid biang ya ka sorkar kam ka Meghalaya Democratic Alliance (MDA)-II, neidaw wa da ya krehlang biang wa ki jooh ki lok.
U Conrad da khana u leh wa da jied ya oo wow man kam u Montri Rangabh wei kam u Montri Rangbah u man u leh kam u Chairman ka MDA-II.
Heiyatoh won wa kiwa daw yoh u ksoh yei kyrdan Montri kiwa em 12 ngut, 8 ngut daw lai cha ka NPP, 2 cha ka UDP, 1 cha ka HSPDP wa 1 cha ka BJP.
Na kini ki 12 ngut, 4 ngut toh kiwa daw lai cha Garo Hills wa kynthup yei kyrdan Montri Rangbah wei 8 ngut won kiwi ki Montri daw man ki na Ri-loom Khasi wa Jaiñtia.
Da khana u leh wa ka Party NPP da e ko yei rai ha oo yow jied yei pyrtuid u Speaker ka yung dorbar wei wow yaklam leh ya kiwi ki Party wa da ya krehlang yow ya mynjur lang yei pyrtuid. Heiyatoh wa i pyrtuid wa daw jied, u Conrad da ong u wa ym pu em chim u yei rai.
Chooh chooh da ong u wa i pyrtuid ki Montri wa ki chnat wow pait ki daw pynbna hadien wa pyndep yei pynsmai wei kamwa man kattæ ym yoh man Montri ki MLA ka PDF.
