U President ka National People’s Party (NPP) kamjooh uwa da chah jied yow man biang kam u Montri Rangbah ka jylla, u Conrad Sangma da ong u wa ym em kwah u wow noh wow kyntait ya ki lok wa da ya jooh krehlang.
Yeini da ong u hawa kylli yeiwa boon bru ka sorkar wa thymme deiwa pynche u wa oo hi wa lai khut ya ka United Democratic Party (UDP) waka People’s Democratic Front (PDF) yow kyrchaan ya ka sorkar wa yahkhmat da ka NPP.
Da e daw u wa ym man wow pynemkaam dep tæ noh ya ki bru hanla da dap bru wow chna sorkar deiwa em 32 ngut ki MLA tangwa oo da lai u da idæ hi yow khut ya ka UDP waka PDF wei ym toh ki wa kynjoh ktien cha oo.
Da pynkynmoo u leh wa ha ki snem wa da dep da ya krehlang deiwa man kiwa yatylli hanla jia katwa jia iwa eh wa da ya tyngkhooh, wei oo ym em mylliñ u yeini, kamtæ da kwah u wow krehlang leh neibynta ki por wow wan wei sñiawkmen u wow yoh u ya krehlang wa ki lok warim.
Kamwa man kattæ kani ka sorkar thymme wa yahkhmat da ka NPP da em ko 45 ngut ki MLA wa kynthup ya 26 ngut na ka NPP, 11 ngut na ka UDP, 2 ngut na ka BJP, 2 ngut na HSPDP, 2 ngut na PDF wa 2 ngut ki MLA wa khlem seiñ.
Ha iwi won i liang da ong u wa hanla em boon i sñiaw yaphær heipor ka Election tangwa u lai chakhmat deiwa em i kyrmen wei wow kreh neibynta i rai ki paidbah.
Da khut u leh ya waroh ki Party ha ini i por wow ya krehlang ki neini chakhmat neibhah itæ toh iwa emkaam.
Heiyatoh won wa i dawa wow yoh Montri Rangbah da u Khasi, da ong u wa kani toh ka synchaar paidbah wei ym toh wow jied deiwa pyrkhat uwa neiwon uwa mihkhmat deiwa pynrap wa i sñiaw kam ini em bait i, ym toh i wym em tangwa waroh iwa da leh toh katkam ka rukom ka synchaar paidbah.
