U Montri Rangbah warim ka jylla, u Mukul Sangma da ong u wa da hap wow pynkynmoo ya ka BJP kawa da ong wym neh chah ko yei baam tooh hadien wa da lai kyrchaan ko ya ka sorkar wa yahkhmat da ka NPP ka MDA-II.
Da ong u wa da hap wow pynkylla noh ya kani ka sorkar MDA wei i daw toh ki kaam baam tooh.
Da kdaw u yeiwa da klam ka BJP chwa ka Election wow phah takit ya ki kaam baam tooh tangwa hadien wym jop ki kyrtong ko da mylliñ ko yeini wei ya kam ini ym em yooluti ki paidbah wow chah thok ki wei kam ki seiñ saiñpyrthai em katæ ka kitkhlieh ya ki paidbah wa boon wa lang.
Da ong u leh wa ini da chynna wa ka BJP klam ko deiwa katwa i kaam won ko deiwi wei kam ka Party wa synchaar ya ka ri hap wow pynkynmoo yeiwa da kular ki iwa da mih wot nei ktien u Prime Minister ka ri yow pynkhooid wei wow pyndooh yei baam tooh.
Chooh chooh da ong u wa ym phær lada jop næ rem neibhah da kular hakhmat ki paidbah kiwa da ngait yeini tangwa lada ym leh won sei kaam, da pynyoo wa waroh iwa da kular toh i thok suda.
Kam wow pynkynmoo wa iwi na ki kular Election ka BJP toh wow thung da ka Task Force wow khlieh da u Judge ka Supreme Court uwa da chong ngiah yow takit ya ki kaam baam tooh hapoh ka jylla Meghalaya.
