Uwa e ktien ka sorkar MDA-II, u Marcuise N Marak da kyntait u wa ka NPP deilang wa ki lok wa da emlang hapoh ka sorkar da yathong bru ki yow taan cheiliang yong ki yow yoh u chna sorkar hadien wa u heh ka TMC u Mukul Sangma da pynbaad u yeini.
U Mukul da pynbaad u wa da sepai i thmu i chna sorkar ki seiñ ri-loom hadien wa joor bha ka yathong ya ki MLA hadooh wa da em kiwa yut yow lai cheiliang ka NPP wot hadien wa da bait ki wow chna sorkar khlem ka NPP.
U Marcuise da ong u wa lada em ki MLA wa thymme wa kwah wow emlang waka sorkar wa yahkhmat da ka NPP, da man ko i kaamram yong ki kam ka Party wow pdiang ya ki deiwa kyntait wa ym em i yathong ya uwon uwon.
U Marcuise uwa man leh kam u Montri ka chnat PHE da ong u wa ka sorkar wa katni daw lehbha ko yei kaam yong ka wei da em ko leh kiwa boon ki Montri sorkar wa da chemphang kiwa da tip bha yei kaam yong ki.
Neiliang won u MLA ka BJP uwa man leh kam u Montri sorkar da kyntait u wa emkti ka Party lada em kam ini kam yathong wow taan bru neibhah oo da lai u cha ka NPP neidaw wa ki heh ka BJP da dep yaklam ki wow ya krehlang waka NPP yow chna sorkar wei ym tip u ya kiwi wei ym emkti u leh lada em iwon iwon i yathong bru.
Da ong u leh wa hadien wa ki paidbah da e ki yei rai, ka BJP da em ko i bynta wa khian kam kawi na kiwa em hapoh ka sorkar MDA-II.
Hawa kylli yei daw wa bien u wow chim smai kam u Montri sorkar wot hadien wa da dep klam che u wa ym bien u wow ya krehlang waka NPP, da jubab u deiwa ong wa hap u wow ngait yeiwa ong ki heh ka Party BJP.
