Ka Synjuk Ki Dorbar Chnong Shangpung da pyntip ki wa da chim ki ya ka rai nadooh wa sdang wow kyrchaan ya u Comingone Ymbon ha ka Election MLA 2023 na 3-Raliang Constituency wei da poi u leh cha ka thong i jop ha kani ka kynti leh.
U Comingone da man u kam u MLA la soo sien kattu, iwa mut da man u kam u MLA nadooh u 2008 wei ha kani ka kynti da man u kam u Montri ka chnat Food & Civil Supply, Consumer Affairs Dept, ka Water. Resources Dept, Home (Civil Defense and Home Guards) Department waka Co-Operative Dept.
Kamtæ ka Synjuk Ki Dorbar Chnong Shangpung da pynman ko ya ka yalang pynkup burom ya u Coming ha ka 11 tarik uni u bnai ha Seiñ Tylli Lang Auditorium Hall ryngkat i emlang ki waheh chnong na ki 9 tylli ki chnong kiwa em hapoh ka lama yong ka Synjuk deilang ki waheh wa emburom ka chnong, ki seiñ kynthai, seiñ khynroo wa kiwi kiwi.
Da yoh leh i klam na waroh ki waheh chnong yong ka Shangpung kiwa e ya ki kyntien kitbok ya u MLA.
Neiliang u Coming hawa e yei klam da sñiawngooh u ya kiwa kyrchaan ya oo na ka 3-Raliang Constituency wei da kular u leh wow e chakri paka khamtam hei roi i paar, i puræ puthi wa i suk i saaiñ hapoh ka Constituency waroh kawi.
