U President ka National People’s Party (NPP) Meghalaya, u Dr. WR Kharlukhi da pynsñiaw u yei khuslai wei tieñ wa neidaw i sñiaw yaphær jaitbru daw ktah i ya ka jylla, wei ye u man wa neiwa em ya ka jylla wa katni daw chah pynkylla noh kam ka Union Territory.
Uwa yahkhmat ka NPP ha ka jylla uwa man leh u MP ha Rajya Sabha da ong u wa hap wow pait bha kammon ka saiñ hima sima ha ka jylla lai ko neibhah ym kwah wow mih i sñiaw yaphær jaitbru wa kwah da u Khasi lane da u Garo, iwa ye u ktah pathan ya ka jylla.
U Dr. Kharlukhi da kyntu joor u ya ki paidbah ka jylla wym toh u wow em i sñiaw yaphær para jaitbru iwa ye wow ktah ya ka jylla, deiwa pynrap wa lada ka sorkar pyrdi ye ko wow leh kam ha Jammu & Kashmir ya ka Meghalaya leh ye u jia.
Ha iwi won i liang uwa yahkhmat ka NPP da ong u wa ka Party da pynkhreh ko neibynta ka MDC Election cha KHADC wa JHADC kawa daw man ha u snem wow wan.
Hawa kylli, da ong u wa ha Jaiñtia Hills ki Party thymme kam ka Voice of the People Party (VPP) wa ka TMC ym em i ktah wei ka yakhun u man bait ko hapyrdi ka NPP wa ka UDP wei ye u man waka Congress kawa da em chwa ya ki Vote.
Hawa yatoh wa ka Khasi Hills, u Dr. Kharlukhi da pdiang u wa i mih yong ka VPP daw em i ktah ha ka Election MDC, neibhah ha ka Election MLA leh da pynlyngngoh ya waroh neibhah wym poi pyrkhat wow em i ktah najrong wa jop 4 ngut ki MLA ha katai ka Election wei da pynkylla ki leh ha kiwa boon ki Constituency.
