U Montri ka chnat Urban Affairs, u Sniawbhalang Dhar hawa yaklam wa kiwa thoh khubor yei daw wym em jop boon ka NPP ha Ri-loom Khasi heiwa na Ri-loom Garo da jop ko 18 ngut, ha Ri-loom Jaiñtia 4 ngut, Ri-Bhoi 2 ngut katwa na Ri-loom Khasi kawa em 24 tylli ki Constituency da jop ha du ar Constituency donhi.
Neiliang u Sniawbhalang da ong u wa ym pu em yoh u ya chong pyrkhat yeini yow chem yei daw wei daw leh yeini manda kut ka dorbar mang tyngka kawa daw man ha uni u bnai.
Da ong u leh wa ha Ri-loom Jaiñtia da jop kamwa da antaad wow jop 4-6 ngut, ha Ri-Bhoi leh 1-3 ngut tangwa khlem da poi pyrkhat ha Ri-Loom Khasi.
Hawa kylli lada em joor bha ka la-ær pyrchah ya ka NPP ha Ri-loom Khasi, da ong u wa daw hap wow pait ya ki daw wa rem ki kyrtong wei da e daw u leh wa ha Ri-loom Khasi em boon ki Party kiwa yakhun.
Heiyatoh wa i dawa wow yoh Montri Rangbah da u Khasi, da ong u wa hap wow burom yeiwa da rai ki paidbah wei yow yoh ya u Montri Rangbah da u Khasi emkaam wow pynjop ya kawi donhi ka Party.
Hajrong won i em ka VPP, u Sniawbhalang ong u wa ktah hi ko ha ki kattu katni ki Constituency kam ha Nongkrem, Mawlai tangwa ym toh ya waroh.
Hawa kylli won chaphang ka AITC, da ong u wa kamwa man kattæ ki bru ym pu em pdiang ki ka kamjooh leh ya ka BJP.
