Ka U-15 Inter District Cricket Tournament 2023 wa pynman da ka Meghalaya Cricket Association da pteiñ biang ya ka ynnin ka sngi heiwa ka Tura District Cricket Association (TDCA) waka East Khasi Hills Cricket Association da khlan bha ki hadien wa kut ka sngi nyngkong wei kani ka Tournament toh kawa pynman ha Ri-Bhoi wa ha East Garo Hills.
Ha Williamnagar, East Garo Hills, ka Zone 2 da sdang ko deiwa jop ka TDCA ya ka kylla-khlem pyrchah ya ka West Khasi Hills District Cricket Association wei da jied ki wow Bat nyngkong heiwa da kamai ki 196 (All Out) ha ka Innings wa nyngkong deiwa lehbha u Ben Haden N Marak (64 na 43 bol) wa u Jamesbirth Ch Sangma (50 na 67 bol). U Jemmillson Marngar (3/24) wa u John Milton Sohphoh (3/28) toh kiwa lehbha na kiwa kawang bol ka WKH.
U Marngar (23) wa u Keeperwelson Sun (27) toh kiwa kamai boon dooh ya ka WKH kawa da yoh 106/10 iwa mut da em ki da 90 chadien, na kiwa kawang bol ka Tura da yoh mar 3 Wicket ya u Jamesbirth (3/16), u Manthan Gupta (3/23) wa u Kein Hagio R Marak (3/46).
Ka TDCA ym em pynslem ko haka Innings wa ar deiwa kamai wut-wut yow yoh 200/2 deiwa dam noh (Declared) ha ka Over wa 25 iwa mut da kamai ki 8 Run chi Over. U Aritra Paul (87) wa u Agatchu Chetai K Marak (86) da wai ki yei kamai deiwa kamailang 173 Run. Ini da booh ko ya ka WKH ka thong wa 291 Run yow jop wei hadooh wa ktu ka sngi da yoh ki 23/6, heiwa u Gupta da yoh u 4 Wicket ha kawi ka Over khlem da e chi Run katwa u Kein Hagio da yoh u 2/23.
Ha ka Zone 1 wa da pynman ha Umbuda, Ri-Bhoi, ka EKH da jop ko ya ka kylla-khlem wei da jied ko wow Bat nyngkong wei da kamai ki 301/9 (Declared) pyrchah ya ka East Jaiñtia Hills. Ya ka EKH da sdang yei kamai da u Ryan Emi Swer (53) deilang wa u Mihsalan Lyngdoh (37), u Damechwa Khongsngi (34) tangwa da wan u Damewanbiang Shadap kam uwa Bat hei khynde wei da kamai u 82 na 78 yow pynpoi ya ka liang yong oo wow tam 300. U Siyon Sangma da ka bol da yoh u 3/60 wa u Rohit Pandey 2/60 ya ka EJH.
Ka EJH da yoh ko wow Bat 18 Over wei da yoh ko 28/8 hadooh wa kut ka sngi deiwa emkaam sa 273 Run. U Mebansiewdor Kharshanoi da ka bol da yoh u 3/3 katwa u Dameiaidap Wahlang won 2/5 ya ka EKH.
