U Jemino Mawthoh, uwa man u General Secretary ka United Democratic Party (UDP) da ong u wa da mih boon ki yukylli wa i chah klam wa ileh ka UDP da lai ksohkti biang ko ha ka sorkar MDA-II wa yahkhmat da ka NPP.
“Nga kwah O wow pynkynmoo cha ki paidbah, wa ka UDP waroh 5 snem nadooh na pyrdi u snem 2013 hadooh 2018, da chong ko ha ka Liang Pyrchah wei da rah ko leh boon ki phang wa yatoh wa i bha i miat ka jaitbru, tangwa hadien ka Election ha u 2018 da hiar leh ki MLA wa jop,” da ong u Jemino hawa klam wa kiwa thoh khubor hadien wa da wai ka yalang yong ka Central Executive Committee kawa da pynman ynne ka sngi ha yung krehkaam ka seiñ.
U Jemino da ong u, “Ha u snem 2013 ka UDP da jop ko 8 ngut ki MLA, hanla waroh 5 snem da chong ki ha ka Liang Pyrchah wei da pynsñiaw ki leh yei sur wa khlan, tangwa ha ka Election ha u 2018, na ka 8 ngut ki MLA wa jop ha u 2013 da hiar won cha ka 6 ngut.”
Uni uwa yahkhmat ka UDP da ong u wa ki paidbah katni da pynbaad wei da kylli ki hajrong i lai kyrchaan biang ka UDP ya ka sorkar tangwa ha u 2018 won hadien ka Election, boon ym kylli ki ya ini i hiar yong ka UDP.
Ha iwi won i liang, u Jemino da ong u wa ha kani ka yalang ka CEC wa da chong hadien ka Election, da yoh wow yaklam wei bichaar bniah hajrong i mih wei leh wow pait bniah yei long i man i jop wa i rem ka seiñ. Ha kani ka yalang da wan chimbynta da kiwa yahkhmat ki District waphær waphær, ki MLA, MDC wa ki kyrtong ka seiñ.
U Jemino da ong u wa wot lada yooluti ka UDP toh yow jop rap boon ha kani ka kynti, tangwa na ki daw ba boon, ym em yoh boon ki MLA, tangwa kam ka seiñ da ye ko wow leh rap bha neibhah lada nujor wa ka Election 2018 ka UDP da jop ko 6 ngut, katni ha u 2023 won da jop hadooh 11 ngut.
Ym du i jop rap boon ki MLA, tangwa ka UDP da ku leh i yoh Vote namo ka ‘Vote Share’ hawa kyruiñ ha Ri-loom Khasi-Jaiñtia, ka UDP ka yoh ko 24.62% katwa ka NPP ha Ri-loom Khasi-Jaiñtia da yoh ko 26.44%.
“Hanla ka UDP da leh ko rap bha bar ya ka Election ha u 2018, kam ka seiñ da yooluti wow jop boon wow yoh yahkhmat ya ka sorkar, tangwa hap i wow burom yei rai yong ki paidbah, hap wow pdiang ya iyi wa da jop,” da ong u deiwa pynrap wa neini chakhmat kam ka seiñ dang kreh ki wow pynkhlan chooh chooh.
Ha kani ka yalang, da yaklam hajrong i pynkhreh neibynta ka Election ha Sohïong Constituency wei kamjooh leh ya ka Election MDC wa MP kawa daw man ha u snem wow wan.
Hawa yatoh waka Election MDC wa MP, da dep wow e kti cha ka Core Committee yong ka seiñ wow pyrkhat kammon wow lai chakhmat wei wow pyntikna leh wa yoh yei jop.
