U Montri Rangbah ka jylla, u Conrad Sangma hawa e yei jubab hapoh ka yung dorbar ynne ka sngi yeiwa da leh ka sorkar yow yada ya kiwa chong chnong wa em ha khappood, da ong u wa ka sorkar da dep ko wow chna thymme 7 tylli ki Border Outpost da em leh ki Police Station wa ki Police Outpost kiwa em hajan wa u pood ka Assam kiwa dang dep chna thymme.
Da khana u leh wa ki DC ki District wa em pood wa ka Assam da yaklam ki dei langær wei da pynmih leh ya ki kyndon (SOP) wa da e cha ki SP wa hap ki wow bood yow pynneh yei suk i saaiñ ha ki thaaiñ khappood wei da dep leh wow chna ya 5 tylli ki Regional Committee yow pynbait noh ya u pood ki 6 tylli ki thaw wa dang sah.
Heiyatoh won wa u pood wa ka ri Bangladesh da khana u wa da em ki Outpost wa ki Infiltration Checkpost wei ki pulit da pynman ki leh yei lai uiñ (Patrolling) yow sonteri ya u pood.
Neiliang u MLA ka VPP u Ardent Basaiawmoit hawa pteiñ wow kylli hajrong kani ka phang wa da wanrah u, da ong u wa ki paaid wa em ha khappood dang im hi ki hei syier mynsien wei i daw toh ye u man wa pynjem ware ka sorkar hadooh wa da nood ka Assam wow kam ya ka Mukroh kawa man kam chibynta ka Assam.
U Conrad da ong u wa iwi na i daw wa chem chitom kiwa sah khappood toh wa ha ki 50 snem wa da lai ym em wa leh yow pynbait ya ki bynta wa em i ya kajia thaw wei em ki por mih i kynaad na waroh ki arliang na ki por cha ki por wei ka sorkar hi kwah ko wow pynbait noh ya u pood.
Da ong u leh wa katni i yaklam para ki khlieh District kamjooh ki Chief Secretary ki ar jylla toh iwa emkaam yow em i sñiawthooh yow tip yow ye u yada nei jia iwon iwon.
Neiliang won u MLA ka UDP, u Nujorki Sungoh da kylli u mynnu u sdang krehkaam ka Mukroh Border Outpost heiwa u Conrad da jubab u wa da krehkaam ko wei ka mang poisa neibynta ini leh da dep wow leh wei da dep jied leh yei thaw wa chipor wow krehkaam ko.
Heiyatoh won wa i dawa wow kyrriah noh ya ka Forest Check Gate ka Assam, u Conrad da ong u wa kani ka kaam dang em ko hapoh ka Commission of Inquiry kawa dang tang takit yeiwa jia ha Mukroh wei ym pu ye wow jubab.
U MLA ka VPP, u Adelbert Nongrum won da kylli u lada ka Mukroh haap ko hapoh ka Meghalaya, u Conrad da ong u wa ka Mukroh haap hi ko ha Meghalaya khlem da artatien nadooh wa kheiñ Census, em ko leh ka VEC yong ka MGNREGA hapoh ka Laskein Block deiwa em 502 tylli ki Job Card, em ko leh ki Polling Station ha kani ka Election MLA wa dang dep pynman kawa haap hapoh ka Mowkaiaw Constituency wei da em ko kiwa thap Vote hapoh ka Mukroh-A toh 802 ngut ki chynrang wa 794 ngut ki kynthai. Chooh chooh da ong u wa ha Mukroh em ko leh ya ka dukan Fair Price Shop ka yong ka Meghalaya heiwa da em 235 tylli ki Card Ration wa da e cha kiwa chong chnong ka Mukroh-A heiwa kiwa yoh myntoi da em ki 1285 ngut. Ha Mukroh-B da saam 179 tylli ki Card Ration wei kiwa yoh myntoi da em ki 974 ngut.
Da ong u leh wa ha ka chnong Mukroh da em ko ya ki yung krehkaam sorkar wa kynthup ya ka Mukroh Govt. LP School waka Mukroh Health Sub-Centre wa kiwi kiwi de kam i pynkrehkaam ya ki Scheme ka sorkar pyrdi da ka sorkar Meghalaya kam ka PMAYG, Jal Jeevan SBM wa kiwi kiwi.
Heiyatoh won wa iwa jia wa chah siat yap ki 5 ngut kiwa chong chonng ka Mukroh, u Conrad da pyntip u wa ka Case da em wa ka Nartiang Police Station wei ym ye u khana chooh chooh neidaw wa ini i kaam dang em ko hapoh i takit ka Commission of Inquiry.
