U Montri Rangbah ka jylla, u Conrad Kongal Sangma da ong u wa i pynkrehkaam ya ka Roster System namo i batai yei rukom bhah kreh cha ki jaitbru waphær waphær hawa pynpsiah kreh ha ki chnat sorkar toh kawa emkaam hawa pynkrehkaam ya ka aiñ bhah kreh namo ka Reservation Policy.
U MLA ka Voice of the People Party (VPP) na Nongkrem, u Bah Ardent Miller Basaiawmoit ynne ka sngi da pynsñiaw u yei klam yong oo hajrong ka Roster System, heiwa da ong u wa ka sorkar toh u pynsangeh ko lane wow yang chwa wow pynkrehkaam hadooh wa da ye u bichaar bniah biang ya ka Reservation Policy.
Hawa jubab yeini, u Conrad da ong u wa lada ym pynkrehkaam ya ka Roster System ym mut wa ya ka Reservation Policy ym ye wow pynkrehkaam pura, tangwa da pynrap u wa ym ye won u tip yei daw wym pynkrehkaam ya ka Roster System ha ki 50 snem wa da dep.
Da ong u wa i pynkrehkaam ya ka Roster System hapoh ka jylla toh katkam wa phah wei da yoh na ka High Court ka Meghalaya.
Hawa yatoh wa ka Reservation Policy, u Conrad da ong u wa ka sorkar da chim ko ya waroh ki phang wa da wanrah wei daw bichaar bniah ya kitai ki phang.
