U Montri Rangbah ka jylla, u Conrad Kongal Sangma da kynthah kylla u ya u MLA ka Voice of the People Party (VPP), u Ardent Miller Basaiawmoit neidaw wym chong de u hapoh yung dorbar hadooh wa da dep jubab u yei yatai hajrong ka mang tangka.
Ka dorbar ynne da man ko ka sngi kawa 6 wei dam ko leh kawa jrong tam neidaw wa da lai ko hadooh 8 waje i miet, heiwa u Conrad da jubab u ya ki phang yong awjan waroh ki MLA deiwa yieñ klam hadooh 3 kynta 17 minit. Tangwa ha i por wa yieñ u wow jubab ya ki phang wa da wanrah da u MLA ka VPP, da kynthah u yei wym em de u hapoh ka yung dorbar.
Da ong u wa heipor wa ki MLA ki klam wei wanrah ki ya ki phang, ka Liang Synchaar man ko kaw ap, kamtæ kyrmen u leh wa ha i por wa oo jubab u, ki dkhot wa em ha ka Liang Pyrchah toh u em ki yow ap.
U Conrad da ong u wa lada sñiawkhia sakhiat ki wa ka dorbar tbian ko, toh u chong bait ki hapoh ka dorbar neibhah ynne ka sngi ka dorbar da jrong bha ko, tangwa sñiawsih wow yoo won wa sah sa du 5 ngut ki dkhot ka Liang Pyrchah kiwa dang ap yei jubab, wei pynrap u wa lada ki dkhot ki sñiawkhia sakhiat ki ya ki phang wa da wanrah ki, toh u em ki hapoh ka dorbar hawa jubab u.
