Ka South Garo Hills District Cricket Association da jop suk ko ya ka Final ka Meghalaya Cricket Association’s U-14 Girls Inter District Cricket T20 Tournament 2023 ha Nongstoin ynne ka sngi.
Ka SGH da jop ko da 129 Run pyrchah ya ka West Jaiñtia Hills DCA deiwa wan sakhi lang ki heh ka Meghalaya Cricket Association.
Kini ki ar liang da psiah Final ki deiwa man kiwa yoh nyngkong na ki ar tylli ki Group. Ka SGH toh du ka na Garo Hills, katwa kiwi kynthup ki ya ka WJH, Shillong Cricket Association, East Khasi Hills CA waka West Khasi Hills DCA.
Ka SGH da jop ko le tylli ki yalehke, heiwa kawi da hap ieh khlem yaleh neidaw wa slai. Ka WJH da jop ko arsien wei da rem ko chisien ha ka SGH katwa kawi won ka yalehke ym yoh u yaleh.
Hadein wa jop ya ka kylla-khlem, ka SGH da jied ko wow Bat nyngong heiwa da kamai ki 206/1 na ki 20 Over heiwa ka Shreya R Marak da haap ko deiwa kamai 18 Run ha ka Carieyoka Lyngdoh (1/68) tangwa ka Tempali Basumatary waka Kimtera D Sangma da neh ki hadooh wa kut deiwa Bat 16.3 Over deilang.
Ka Basumatary da kamai boon dooh ko deiwa yoh 81 Not Out na 72 bol deiwa dat 10 tylli ki 4 Run katwa ka Kimtera won da yoh ko 56 Not Out na 60 bol wa kynthup ya 5 tylli ki 4 Run.
Du ka Anastesia S Shullai kawa ye u yoh palat 10 Run ya ka WJH kawa da haap hadien wa kamai 14 Run, deiwa lehbha kiwa kawang bol ka SGH wa kynthup ya ka Shreya 3/6, ka Dejiansua M Sangma 3/20 waka Kimtera 3/20 deiwa pynhaap lut ya kiwa Bat ka WJH kiwa da kamai 77 na 18.2 Over.
Kamtæ ka Kimtera da yoh ko yei naam Player of the Match.
Ki kynthai ka SGH leh da pyntam ki ya waroh heiwa ka Basumatary (223) waka Kimtera (193) toh kiwa kamai boon dooh ki Run katwa ka Shreya (11) toh kawa yoh boon dooh ki Wicket ha kani ka Tournament.
