U Montri wa pait ya ka puræ puthi ha ka jylla, u Rakkam A Sangma ynne hapoh ka yung dorbar da khana u wa ka sorkar ym em thung ko ya kiwa sikai ha kiwa boon ki skur SSA neidaw wa duna ki khynnah.
Hawa jubab yeiwa kylli wa da wanrah da u MLA ka Congress na Mawhati, u Charles Marngar, neiliang u Montri da ong u wa katkam i chem ha ki skur SSA duna bha ki khynnah kiwa lai skur, wei pyntip u wa em hadooh 903 tylli ki skur SSA kiwa em khynnah du hapoh 20 ngut.
Da khana u wa em 45 tylli ki skur Lower Primary kiwa em khynnah du hapoh 10 ngut, wa 62 tylli ki skur Upper Primary kiwa em khynnah du hapoh 10 ngut, wei em leh ki skur ki wym em khynnah tang uwi leh.
Hawa yatoh wa ki skur sorkar, u Rakkam da khana u wa neidaw wa hap wow pynkrehkaam ya ka Roster System wa da phah da ka High Court yong ka Meghalaya, kamtæ i thung kaam da chimpor wei neiliang ka chnat da leh ko ya iwa emkaam wow pyndap ya ki kaam sikai wa thylli.
Hachwa ya ini hawa jubab ya ki yukylli, u Rakkam da pyntip u wa em hadooh 420 tylli ki kaam sikai wa lait hapoh ki skur Samagra Shiksha Abhiyan (SSA) wa 1219 tylli ki kaam wa lait ha ki skur sorkar nadooh ki skur LP, UP, Secondary wa Higher Secondary.
