U MLA ka Mowkaiaw, u Nujorki Sungoh ynne ka hapoh ka yung dorbar da kylli u na u Montri ka chnat PWD (R), u Prestone Tynsong wa lada daw kyrriah noh ya ka PWD Sub-Division Number-1 yong ka PWD Shangpung Division kawa dang neh ha Jowai.
Neiliang u Montri da pyntip u wa dang pait yei rah ya kani ka Sub-Division kamjooh leh lada yoh thaw wei deiwa yaklam ya pynbait chwa wa waroh kiwa daw chah ktah deiwa leh yeini.
U Nujor da kular wa ym eh wow yoh thaw wei da wanrah u ya kani ka phang toh neidaw wa ka PWD Sub-Divisoin-1 dang em bait ko ha Jowai hanla em ko hapoh PWD Shangpung Division kawa da em ha Shangpung tangwa kani ka Sub-Division won dang neh bait ko ha chnong Jowai.
Kamtæ da ong u wa ym em yumut wow ieh ya kani ka Sub-Division ha Jowai wei da kyntu u wow chimkhia ka sorkar yeini i kaam yow em noh ko hapoh ka Constituency yong oo.
U Montri da pyntip u wa ki thaw wa pait kani ka Sub-Division toh kiwa haap hapoh ki ar tylli ki Constituency kitæ ka Raliang waka Mowkaiaw wei ki chnong wa em hapoh ka Raliang Constituency wa em ha kani ka Sub-Divison toh ka Nangbah, Pasyih, Kyndongtuber, Mynso, Nongjngi wa ka Pammanik katwa kiwi won ki chnong wa pait kani ka Sub-Division toh kiwa em hapoh ka Mowkaiaw Constituency.
Hajrong ini, u Nujorki da ong u wa da toh u rah noh ya kani ka Sub-Division wei da paan u leh yei kular u Montri uwa da jubab wa kular u wow pait yeini.
