U MLA ka Nongkrem, u Ardent Basaiawmoit wa u MLA ka Umsning, u Dr. Celestine Lyngdoh ynne hapoh ka yung dorbar mang tangka da wanrah ki ya ka Cut Motion yow yaklam ya ka phang wa tlot i krehkaam ki pulit hapoh ka jylla.
U Ardent da kwah u wow tip kammon ki pulit ka Meghalaya kiwa da ye wow pynrem ya ka HNLC waka ANVC ym ye ki wow ksoh u kem wei wow pyndooh jait yei kit mooyong pyrchah ya ka aiñ hadooh wa ka High Court da phah ko da ki CISF wow leh yeini.
Da kwah u leh wow tip uyi wa e hukum yow siat yap ya u Cherishterfield Thangkhiew heiwa wot u Rtd. Judge T. Vaiphei leh ha ka takit u da ong u wa da pynemkaam palatpood yei bor ha ka sngi wa jia ini.
U Ardent da ong u leh wa ka sorkar ymtoh wow pynkitkhlieh ko yeini ha kiwa khian wa nai yow lait ko nei bahkhlieh neibhah kiwa ha-yung u Cherishterfield dang yang ki wow yoh yei hok kamjooh kiwa chong chnong ka Mawlai.
U Dr. Celestine won da dawa u wow pynlaitlooid ya ki pulit wow krehkaam ki yow ye ki u kdoh u khoom ya ki jaitbru High Level neibhah ya kiwa dai drugs dang ye u kem katwa ka Truck 12 chaka wa kit mooyong won ym ye wow kem.
Neiliang u Montri wa pait ya ka kaam pohyung, u Prestone Tynsong da e jubab u deiwa ong wa ym em yooluti u wa kat da uwa mihkhmat paidbah wow pynpoor u ya ki khubor thok wa em kam kitæ ki jaitbru thymme kiwa tip kam ki High Level hapoh Meghalaya.
Heiyatoh won wa iwa ong u Ardent, u Prestone da jubab u deiwa ong wa u Ardent da yaroh u ya ki pulit wa da ye ki wow leh boon ki kaam tangwa da tlot ki du ha iwi iwa jia wa da pynbaad u wa em kiwa em hei bor wa jied iwon iwa biang wa iwon iwa sih, kamtæ u Montri da pynche u wa ki pulit kreh laitlooid ki yow leh yei kaam yong ki wa yatoh waka aiñ wei ka sorkar ym jooh pynwit ko.
Heiyatoh wa ki High Level Committee da ong u wa ileh wym wanrah ya kini ki dkhot ka High Level chakhmat lane wow e FIR pyrchah ya ki lada em kam kini ki bru.
Hajrong iwa jia won ya u Cherishterfield da ong u wa dadep wow wanrah hapoh ka yung dorbar. Katni ini i kaam neiliang ka sorkar da dep paan pynche ko na ki pulit wa emkti ha ini i kaam wei da yoh leh yei pynche ha kini ki tayaw wa dep wei kattu ka sorkar daw pait bniah ko kammon wow leh wei ini ymmut wa ka sorkar kwah ko wow pynslem yei kaam wei daw leh ko yeiwa emkaam wa iwa toh u leh ko.
Heiyatoh won wa ki CISF da ong u wa ki pulit ye ki wow leh yei kaam yong ki tangwa ym bien u wow ong ya ka hukum wa da pynmih da ka High Court.
Neiliang u Ardent da ong u wa ym em hun u yei jubab deiwa ong wa ym em jubab u yeiwa kylli u wa uyi wa e hukum wow pynyap ya u Cherishterfield heiwa u Prestone da ong u wa ym ye wow jubab yeini neibhah dang ini yoh yei pynche na ki pulit wa em hawa jia iwa jia.
Da kylli chooh chooh u wa lada i thmu ka sorkar toh wow phah pynyap næ phah kem ya u Cherishterfield heiwa u Prestone da ong u wa ka hukum toh yow kem.
U Montri da ong u wa ka bui (Report) da dep e paidbah wei hap wow puræ bniah ya ka yow tip yeiyi wa jia neibhah ha katu ka Report da klam che wa da phah ya ki pulit wow kem.
Ini i jubab ym em pynhun ko ya u Ardent uwa da ong wa ymtoh wa lai kem ya u bru wa kieñ suloi cha khloo wei ini da jia i ha yung u bru wa dang thiah ha thaw thiah, hajrong ini da kyntait u wow pyndam ya ka Cut Motion yong oo, kamtæ u Deputy Speaker, u Timothy D. Shira da booh u hakhmat ka yung dorbar kawa da pynrem noh ya kani ka Cut Motion.
