Kam chibynta wow pynche wei wow pynyoo laad pynyoo luti ya ki khynnah puræ ka Eastern West Khasi Hills District hajrong ki laad yoh kreh ha ka liang uiñke suwari nadooh i rukom pdiang ya ki bru (Hospitality), neiliang ka yung krehkaam ka Block Development Officer, Mairang C&RD Block dei ya krehlang wa ka Indian Institute of Hotel Management, Shillong ha ka 3 tarik uni u bnai da pynman ki ya ka yalang wow batai wei e sikai neibynta ki khynnah wa dang lai puræ ka thaaiñ kiwa em yei thmu wow lai puræ ha kani ka liang.
Ha kani ka yalang wa da pynman ha Tirot Sing Memorial Hall Pyndengumiong, Mairang da wan wow chimbynta da ka Dr. L.R. Hynniewta, kawa man ka BDO ka Mairang C&RD Block, u S. Khonglah, uwa man u Lecturer ka IIHM, Shillong, ka S. Wahlang, kawa man kam ka Demonstrator ka IIHM, Shillong, kiwa sikai skur wa ki khynnah wa lai puræ yong ki skur wa College ka thaaiñ kiwa kynthup ya kitu kiwa da wan na ka Mairang Presbyterian Higher Secondary School, Mairang, ka Khadsawphra College, Mairang, ka St. Thomas Higher Secondary School, Mairang wa ka Myriaw RMSA Higher Secondary School, Myriaw.
I thmu yong kani ka e sikai toh yow kdaw ya ki laad ki luti ya ki khynnah wa lai puræ ka thaaiñ hajrong ki laad yoh kreh lyngba ka chnat uiñke suwari kawa man kawi na ki chnat kawa da nang ku na i por cha i por lyngba i yoh kaam yoh kamai yong kiwa chong chnong.
Ha kani ka sngi, ki khynnah ka thaaiñ da yoh ki yei pynche leh hajrong ki jait lai puræ ya kiwa ye u yoh hapoh ka Indian Institute of Hotel Management, Shillong kiwa kynthup ya ka B.Sc Hospitality & Hotel Administration, ki Diploma Course neibynta kitu kiwa da dep ya ka Class 12 wa kamjooh leh ki Short Term Certificate Course neibynta kitu kiwa da pyndep ya ka Class-X.
