Ka Khasi Students’ Union (KSU) da rai ko wow booddien ya kiwa boon tylli ki pahang wa sahteiñ neibynta i bha i biang yong ka jylla, khamtam hawa yatoh wa i dawa wow pynkrehkaam ya ka Inner Line Permit (ILP), i pynpsiah ya ka ktien Khasi ha ka 8th Schedule, i pynbait ya u pood u ang wa ka jylla Assam, i kyrriah ya ki bru wa sah ha Them Metor wei kamjooh neibynta ka puræ puthi najrong kiwi kiwi de ki phang.
Ka KSU kawa man kawi na ki seiñ yong kiwa dang lai puræ ka jylla, da pynman ko ya ka General Executive Council ynne ka sngi heiwa da ki spah ngut kiwa yahkhmat na ki Unit wa ki Circle waphær waphær dapoi ki wow ya phyllu yumut hajrong kiwa boon tylli ki phang wa kiwa dang sahteiñ.
Ha kani ka yalang, neiliang ka seiñ da chim ko leh ya ka rai wow pynman yei jied ya ki dkhot wa kiwa yahkhmat wa thymme yong ka Central Executive Committee ha ka 6 tarik u bnai wow wan.
U President ka KSU, u Lambokstarwell Marngar da khana u wa ha ka General Executive Council, neliang ki dkhot yong ka seiñ da sai ki yei e yumut hajrong kiwa boontylli ki phang, wei ya kini ki phang da e kti wow booddien bait ha kiwa yahkhmat wa em hakhmat yong ka Central Executive Committee.
Ha kani ka sngi kawa man leh ka sngi kyrsu ri namo ka National Awakening Day, neiliang ki dkhot ka KSU da pynlait paidbah leh yei rwai yong ka dhab tem wa tip kam ka ‘Dymbur’ wa da rwai hajrong u khlawait wa u Syiem ka Hima Nongkhlaw, u Pa’iem Tirot Sing.
