Ka seiñ Jaiñtia Fishing & Environmental Protection Association (JFEPA) hapoh i yahkhmat u President yong ka, u DH Pde deilang wa u General Secretary, ynnin ka sngi da lai hiar ki cha ka chnong Amlanai kawa em hajan ka chnong Muktapur heiwa da em leh ka Unit ka JFEPA ha kani ka chnong yow booh ya u moo sahnaam yow kynmoo burom ya ki dkhot warim yong kani ka Unit kiwa da seiñ ya ka chnat heitai kamjooh ki bru ka chnong wa da kreh chitom wow pynneh pynsah ya ki dohum ha ka chnong Amlanai.
Ya uni u moo sahnaam da booh harood ka wah Lakyntiang kawa man kawi na ki wah pait wa sumaar da ka JFEPA Amlanai Unit.
Ya ka yalang da pynlai da u waheh chnong ka Amlanai, u Jendis Khongiong wei ya ki kyntien e khublei da e da u Secretary ka chnong, u Samuel Gashnga.
Ya ki kyntien kyrsu kyntu da yoh na u waheh chnong kamjooh na u President ka JFEPA wa na u General Secretary warim ka JFEPA, u Wom Pakyntein, na u I/C ka Muktapur Outpost, u SI Pala wei na uwi na ki bru waheh ka chong Syndai Mission, u Lut Syngkor kiwa da kyrpaad wow yada kamjooh wow maham ya ki paidbah kani ka thaaiñ kamjooh ka Satpator wym hoi u wieh dawai, u pynemkaam da ki bomb næ da ki jaar ha ki um ki wah wei lada chem toh u pynchitom ya ki katkam ki kyndon wa da booh da ka chnong, da ka JFEPA kamjooh da ki bor ka aiñ.
