U Symbood Montri Rangbah ka jylla uwa pait leh ya ki kaam pohyung, u Prestone Tynsong da ong u wa ynne ka 11 tarik iwa jia ya u Pastor RG Laloo wa u Tbn. T. Nongkhlaw ha Patna, Bihar ym em iwon iwon i wow khuslai tangwa mih i du nei sñiawthooh bakla donhi.
Da ong u wa mar tip yeiwa jia, u Chief Secretary wa u DGP ka jylla da yaklam ki wa u Chief Secretary wa DGP ka Bihar heiwa da em i sñiawthooh yumut khlem iwon iwon i jia kamwa da pynbaad ha ki Social Media wa chah dat ha ki dkhot ka Bajrang Dal namo ka VHP. U Prestone da ong u wa ki paidbah da sñiawthooh bakla ki iwa da wanrah yei yaphær jaitbru.
Da ong u wa kini ki ar ngut da wan synraanlang ya ki da ki pulit ka Bihar chadooh cha Airport yow ku lieñsuiñ yow liwan cha ka jylla.
Da pyntip u leh wa kini ki ar ngut kiwa yahkhmat Balang da ujor FIR ki leh hajrong ini wa jia.
