Ka High Court ka Meghalaya da chong bichaar biang ko ya ka mukotduma wa yatoh wa i tih mooyong pyrchah ya ka aiñ ynnin ka sngi yow booddien yei wan ki CISF (Central Industrial Security Force) wow pait ya ki kari wa kit mooyong pyrchah ya ka aiñ, heiwa neiliang u Dr. Nitesh Mozika, DSGI da pyntip u wa ki CISF ym bien ki wow leh yeini neibhah ini i kaam ym em haap ki hapoh ki kaam wa toh u leh ki.
Neiliang ka High Court da pynche ko wym em kwah ko da ki CISF hiwot neibhah nyngkong da kwah ko wow phah da ki Central Reserve Police Force (CRPF) tangwa hadien wa da pyntip wa ki CRPF daw em ki hapoh i pait ki pulit ka jylla, kamtæ da pyrkhat da ki CISF neibhah ki man ki kiwa laitlooid neidaw wym em ye ki pulit wow pynsangeh yei kit mooyong pyrchah ya ka aiñ.
Chooh chooh ka yung bichaar da ong ko wym em e hukum ko wow phah wan da ki CISF tangwa da kylli hi-eh ko lada man ki kiwa da pynkhreh wow wan, hanla kattæ leh daw hap ki wow e jubab yeini wym bien ki u wan.
Kamtæ da chim ya ka rai wow phah ya ka sorkar pyrdi lyngba u Secretary ka Home Ministry wow phah 10 tylli ki Company ka Central Armed Police Force (CAPF) kiwa daw em hapoh i pynlai wa laitlooid lane da ki heh pulit ki wow jied da ka yung bichaar ki wow pait du yei kit mooyong pyrchah ya ka aiñ.
Ka High Court da sñiawkhia ko yei pteiñ i tih mooyong pyrchah ya ka aiñ hapoh ka jylla wot hadien wa pynmih hukum ka Supreme Court ha u 2016 wei i kit ya u mooyong pyrchah ya ka aiñ da leh deiwa laitlooid hadooh wow chalan cha Bangladesh.
Ka High Court da pteiñ ko wow beiñ ya ki pulit ki wym ye u pynsangeh ya ini waroh neibah da man i kaam yong ki wow pynkrehkaam ya ka hukum ka Supreme Court, kamtæ da sñiaw emkaam wow wanrah da ki bor wa na baar yow pait ya ini i kit ya u mooyong pyrchah ya ka aiñ hapoh ka jylla.
Ya kani ka mukotduma daw chong bichaar biang ha ka 27-04-23.
