U President ka Voice of the People Party (VPP), u Ardent Miller Basaiawmoit da phah khubor u cha ka sorkar jylla wa toh u pynsangeh chwa yei thap kreh kat wym pu ye u pynbait ya ka Reservation Policy.
Ka VPP da sdang ko ya ka yalang paidbah na Mawlai Phudmuri Madanheh ynne ka sngi yow dawa pynbait thymme ya ka aiñ bhah kaam namo ka Reservation Policy wei ya kam kani ka jooh ka yalang paidbah daw pynman leh cha kiwi ki bynta yong ka ri Khasi Jaiñtia.
Hawa klam ha kani ka yalang, u Ardent da ong u wa ka VPP ym em pyrchah ko ya ka Roster System tangwa kwah ko wow pynbait chwa ya ka Reservation Policy. Da ong u wa boon bah ki kynroo khyllood da khuslai wei dooh kyrmen ki wow yoh kaam yoh jaam.
Neiliang uni uwa yahkhmat ka VPP da ong u wa ka sorkar toh u ap ko yei e yumut wow chna ya ka Committee wa kyrpang deiwa em kiwa stat na waroh ki jaitbru ka jylla kiwa kynthup ya ki Khasi, Jaiñtia wa na ki Garo wow thooh yei tam i duna hawa pynkrehkaam ya ka Reservation Roster khnang wa ym ktah chiliang ya kawon kawon ka jaitbru.
