Jowai: Ka Bio Resources Development Centre (BRDC), Shillong hei krehlang wa ka Thadlaskeiñ Enterprise Felicitation Centre (EFC), ynnin ka sngi ka 8 tarik, da pynman ki ya ka e sikai wa kyrpang ya ki warep ka chnong Wahiajer, West Jaiñtia Hills District hajrong wa kammon u chna sboh, ki vitamin wa ki dawai tynyap khniang.
I thmu wow pynman ya kam kani ka e sikai ya kiwa rep toh yow pyndooh pyndam noh ya i e pynemkaam ya ki sboh dawai (Chemical Manure) wa i siat Pesticide kiwa kthah joor bha ya ki jhoor kamjooh leh ya kiwi ki bru.
Ha katai ka sngi boon kiwa chong chnong yong ka Wahiajer da wan ki cha kani ka e sikai. Ya ka e sikai wei i batai bniah kammon u chna ya i sboh da e da u Richborn Marwein uwa man kam u Multi Tasking Assistant (MTA) uwa da batai chaphang kammon u yoh sboh kawa bha taam na i jhep kam ki jhoor ki baam wa noh ki bru. Da pyntip leh wa i ait masi toh i sboh wa bha tam.
Hei yatoh won wow chna ya ki vitamin kiwa tip leh kam ki Organic Growth Promoter da sikai wow pynemkaam da ki snieh ki jhoor lait noh u soh jaw deiwa khleh lang wa i mynkruid wa ka um wei wow ieh ya ka chi bnai deiwa tymmoh ki.
Ya i rukom chna dawai khniang wa tip kam ka Broad Spectrum Bio-Pesticides won da batai da ka kong Elisha Jala wa ka Dr. Easter Jone Marbaniang kiwa man kam ki Research Associates (RA) kiwa da hikai u chna ya ki dawai khniang deiwa pynemkaam da ka sla Seinthap, sla German (Eupatorium leaf), syntu lahari, sla Duma, jung masi, ka um, u sying, sumurit wa u rasoon. Ya kini waroh toh u pdem um kamwa chi bnai yow man dawai khniang kawa bha palat ya iwa thied na dukan.
Ya kani ka e sikai da pyllai da ka kong Muhorksiar Syngkon kawa man leh kam ka ERP Thadlaskein EFC.
Discussion about this post