Ka Tep Kyndait Government U.P. School, Tuber Kmaichnong, kawi na ki skur hapoh ka chnong Tuber kawa yah luti ya chiboon ki kaam wa bha hapoh ka chnong, ynne ka sngi da pynkut ko ya ka Annual School Week 2023 ka yong ka deiwa wan sakhi da u Waheh Chnong ka Tuber Kmaichnong, u Mickey Lyngdoh kam u kongsan wa u Juhhi Lyngdoh, Executive Member Chnong.
Ya kani ka Annual School Week da sdang nadooh kani ka 24 tarik deiwa pynman chiboon ki yalehke ha madan wa hapoh ka yung skur kam ki Quiz, Debate wa kiwi.
Yei naam Best Group da rah da ka Daffodil Group katwa ya ka Best Discipline Group da rah da ka Dahlia Group.
Hei klam yong u kongsan, da e bor e mynsien u ya ki khynnah deiwa ong u wa oo hi da sihlet u wym jooh ya chimbynta u ha ki kaam Sports heipor wa dang lai skur u. Da ong u wa katni yang yooluti kiwa lai skur wow yoh krehkaam sorkar, tang iwa suk dooh toh u pynkrehkaam yei sap yong phi, ha kiwa boon ki liang wei kani leh pynsuk ko ya phi wow yoh kaam yoh jaam.
Ya ka yalang da pynlai da u Headmaster ka skur, u Riquoma Rq. Laloo, katwa ya ki kyntien e khublei da yoh na u Ribait oo Pde, uwa sikai kani ka skur.
