Ka yung krehkaam yong ka District Sports Officer ka East Jaiñtia Hills da pynlut ko ya ka District Level Chief Minister’s U-12 Boys & Girls Football Tournament ynne ka sngi kawa da pynman ha madan Deinchynrum.
Ha ka yakhun Final ki kynthai hapyrdi ka Wapung Block waka Jalaphet Zone Saipung Block, da jop da ka Wapung da 1-0 lyngba ka kool wa thap da ka Larisha Lyngdoh ha ka minit wa 37.
Ha ki chynrang won, ka Wapung Block da pynrem ko ya ka Lumshnong Block da 3-1 da ki kool wa thap u Lazio Dkhar ha ka minit wa 10 wa 46 wa u Khroobormi Sutnga ha ka minit wa 13 katwa ya ka Lumshnong da thap da u Ennocent Mylliem ha ka minit wa 17.
Da wan wow sakhi ya kini ki yakhun Final da u Additional SP ka East Jaiñtia Hills District, u Banraplang Jyrwa kam u kongsan wa u waheh chong ka Deinchynrum, u Welbert Nongtdu kam u symbood kongsan deiwa emlang ka District Sports Officer, kiwa sikai skur wa ki dkhot ka East Jaiñtia District Sports Association deilang waka Grassroot Coach na ka yung krehkam ka DSO ka District .
Kiwa jop kattu daw mihkhmat ki ya ka District wow lai yakhun cha ka kyrdan ka jylla kawa daw man ha ka 11 tarik u Naiynru uni u snem.
