Ka Khasi Students’ Union Laban Circle ynne ka sngi da lai pait ko ya ki dukan baam, dukan dihcha kiwa em ha Laban, Lumparing, Lumshatsngi wa ka thaaiñ K.O.R. yow chem hadooh katwon khooid suba i rukom krehkaam kini ki dukan neibhah wa da yoh ujor man-i-por na ki paidbah wa kini ki dukan toh kiwa taroi hadooh kattæ kattæ wei da em boon kiwa yoh kjut deiwa baam na kini ki dukan.
Ka seiñ da lai pait ko ya 27 tylli ki dukan baam wei da chem wa boon na kini ki dukan ym em ki ya ka ka License na ka Food Safety and Standards Authority of India (FSSAI) kawa chah wow wai ki dukan wa dai ya ki marbaam wei da chem leh wa em ki kattu katni ki dukan kiwa da yoo chyrkhei i tngit wei ka seiñ da hap ko wow khang khyrdep chwa ya kini ki dukan kat wym pu ye wow pynkhooid katkam ki kyndon wa da booh ha ka FSSAI. Kini toh ka Appayani Tea Stall ha Laban, ka Babua Tea Stall ha Lumshatsngi, ka Dada Stall ha Red Cross waka Ruma Das Tea Stall ha Laststop.
Kamtæ ka seiñ da chim ko leh yei rai wow phah leh ya ka Report yong ini wa chem ko cha u Food Inspector, FSSAI wa cha u Montri wa toh u pait yeini.
Ka seiñ da kyntu ko leh ya waroh ki dukan dai marbaam wow man ki kiwa lehkhooid kamjooh ki tiar ki tar wa pynemkaam ki yow lait u chah ktah i chait i khiah ki paidbah.
