Ka UDP da ku i em MLA ko cha 12 ngut deiwa jop u kyrtong ko na Sohiong, u Synshar Kupar Roy Lyngdoh Thabah uwa da yoh 16,679 Vote heiwa da yoh wa ar u kyrtong ka NPP, u Samlin Malngiang uwa da yoh 13,257 Vote, hei wa le u kyrtong ka Congress, u S. Osborne Kharjana uwa da yoh 1762 Vote, hei wa soo u kyrtong ka AITC, u Stodingstar Thabah uwa da yoh 89 Vote, hei wa san u kyrtong ka HSPDP, u Shandor Ryntathiang uwa da yoh 62 Vote wei hei wa ynru da yoh u kyrtong ka BJP, u Seraph Eric Kharbuki uwa da yoh 40 Vote katwa u Nota da yoh u 272 Vote.
Ini mut i wa u kyrtong ka UDP da yoh u 51.86% ki Vote kam uwa jop wei da jop u leh deiwa tam 3422 Vote ya u kyrtong ka NPP.
U Synshar hawa e yei klam hadien wa jop da ong u wa kwah u wow man kam uwa mihkhmat paidbah uwa ye wow klam ya kiwa boon ki phang wa emkaam ki paidbah hapoh ka yung dorbar chna aiñ.
Da pdiang u leh wa da yoh u ya ki Vote wyrai neibynta u ma heh u, u tynde u HDR Lyngdoh wei u kreh u yow pyndep waroh ki kaam wa dang sah u ma u.
Da ong u leh wa daw man u uwa wanrah u yaklam hapoh ka dorbar chaphang ka ILP, ka Roster System, ka UCC kiwa da man leh ki kular Election.
Kamtæ da ong u wa nadooh myntu ka sngi da man ko ka juk wa thymme ya ka Sohiong Constituency kawa da sngat ha kini ki 5 snem wa da lai.
Hanla jop ka UDP leh, dang eh i wow wanrah yei kylla ha ka sorkar neibhah ka NPP deiwa psiah ka PDF da em ko 28 ngut ki MLA, deilang wa ar ngut ki MLA ka BJP da em chwa ki 30 ngut ki MLA wei i kyrchaan ki ar ngut ki kyrtong samen da em ki waroh 32 ngut ki MLA iwa mut lada pyrchang wow chna sorkar khlem ka NPP wa ki lok ko toh iwa eh.
