Ki ynru tylli ki dorbar chnong na Elaka Narpuh, East Jaiñtia Hills District wa kynthup ya ka Dorbar Chnong Umkiang, Dorbar Chnong Kuliang, Dona Skur, Dona Umbluh, Lumphyllut wa Dorbar Chnong Pyrtakuna ynne ka sngi da e dorkhat ki ha u Deputy Commissioner ka East Jaiñtia Hills District wow dawa kyrriah noh ya ki chipai BSF kiwa yang sonteri ha u sarokbah NH06 ha Sonapur wa ha Ratacherra.
Ha ka dorkhat ki waheh chnong da maham ki wa lada ym pyndam næ kyrriah noh ya kini ki chipai na ini i thaw daw mih i yakhih hapyrdi ki paidbah wa ki chipai.
Da pynsñiaw ki yei wym sñiawsuk wow em ka ktem ki chipai ha uni u sarokbah neibhah kini ki chipai jooh pyndik ki ya kiwa lai wa wan dei langær iwa da wanrah leh yei syir mynsien ya ki paidah neibhah ha kani ka BSF Check Post ha Sonapur wa rap maa toh wa pynyang ki da ki naar wa nep kam ki kajiar hapyrdi sarok wa lai wa wan ki kari la kam wa pynkhreh thma.
Da kdaw leh wa ki chipai BSF da lai ki ha man-ki-yung ha Umkiang wei jooh chondur ki ya ki thaw wa booh tiar (Godown) yong kiwa chong chnong wei ini i leh ki chipai da pynphylla i ya ki paidbah wa chong chnong kiwa ym jooh em iwon iwon i thmu wa sih wei boonsien ki bor chnong jooh yoh ujor ki na ki paidbah chapang i leh embor ki chipai BSF kiwa em ha Ratacherra wa ha Sonapur.
Ki waheh chnong da ong ki wa la man katwa man leh ym pdiang ki ya kini ki chipai u em ki ha u sarokbah wei wot ka National Highway Authority of India leh man-i-por da thooh ko ki laad ki luti wow kyrriah noh ya ki chipai kiwa yieñ sonteri ha Sonapur neibhah wa wanrah i yei sih ki sarok, i sahkut kari wei kamjooh iwa pynsih ya kani ka yingkieñ.
Da ong leh wa kini ki chipai ka BSF da man la kamwa da chna pynskem ya kani ka ktem heithaw wow lai sonteri ki ha khappood bar wow pynwit pynthut yei lai i wan ki paidbah.
Hawa yaklam wa kiwa pathai khubor, ki waheh chnong da ong ki wa hei sakhiat kini ki chipai BSF toh u em ki ha khappod wa ka ri Bangladesh, neibhah man-i-por ki nong Bangladesh jooh psiah tooh ki cha India na ki khloo kiwa em ha East Jaiñtia Hills District, tangwa ka sorkar da phah wan sonteri pathan ko ya ki ha u sarokbah.
Kam wow kdaw heini ki dkhot ka KSU Narpuh da pynsñiaw ki yei chrai hajrong i wan psiah tooh ki bru na Bangladesh cha India lyngba kawi ka khloo wa em ha Kuliang deiwa suk, da kylli ileh wa ki chipai BSF ymye ki wow kem ya kam kini ki bru wa wan psiah tooh cha ri India, wei da dawa ki wa kini ki chipai na Sonapur wa na Ratacherra wow lai ki cha ki thaw khloo wow paitsiar ya i psiah i mih ki nong Bangladesh.
Ya kani ka dorkhat da phah leh cha u Montri ka chnat Pohyung wa cha u MLA ka thaaiñ ka Santa Mary Shylla.
