Ynne neiliang ka sorkar MDA-II da khut ko ya ka yalang yow pynche cha waroh ki MLA wa em hapoh yong ka kamjooh ki heh sorkar hajrong kammon u pynkrehkaam ya ka Roster System heiwa kiwa boon da mynjur ki hanla dang em ki wym pu em che wei dang em ki boon ki yukylli yow sñiawthooh pura ki yei rukom krehkaam kani ka Roster.
Hawa yaklam wa kiwa thoh khubor hadien wa wai ka yalang, neiliang u Montri Rangbah ka jylla, u Conrad Sangma da ong u wa ya ka Roster da toh u pynkrehkaam nadooh wa sdang katkam wa da phah ka Supreme Court kamjooh ka sorkar India tangwa ym em leh yeini nadooh ka sngi wa nyngkong kamtæ ka Reservation Policy ym em da pynkrehkaam ya ka kamwa da thmu hawa chna ya ka.
Da pynche u leh wa i pynkrehkaam ya ka Roster ym mut wa daw yoh myntoi kawi donhi ka jaitbru tangwa u yoh waroh katkam ka hok wa da bynta ya ki.
Da e nongmuna u kammon i rukom pynkrehkaam ya kani ka Roster System iwa da pynche leh ynnin ka sngi cha ki Montri ka sorkar deiwa ong wa lada lait kreh 10 tylli, mar soo tylli u lai cha ki Garo wa ki Khasi-Jaiñtia katwa kiwa sah won cha kiwi katkam ka bhah.
Lada lait kreh biang iwi donhi, daw lai cha ki Khasi-Jaiñtia wei lada lait kreh biang sa iwi daw lai cha ki Garo kamtæ kut wa lait kreh kani ka Roster u pyntikna ko wa waroh u yoh ki yei bhah yong ki.
Heijooh i por da ong u wa ym em mut wa suk kamni i pynkrehkaam ya ka Roster neibhah em ki wow jia iwa daw hap pynche bniah bha neibhah daw em ki por ki bru yoo ki wa lai boon cha ki Garo lane cha ki Khasi-Jaiñtia tangwa ka Roster da kheiñ ko hawa lait kreh ini wa dep cheiwon lai boon wei cheiwon duna kamtæ hawa pynbna kreh daw kheiñ deiwa pyndap ya kitu kiwa dooh yei bhah yong ki.
Kamtæ da ong u wa lada ymem ka Roster daw dooh chibet da ki Garo lane ki Khasi-Jaiñtia kamjooh kiwi ki jaitbru kawa toh hok ki wow yoh.
Da ong u leh wa ha kini ki le sngi wa da booh ka sorkar wow yaklam ya ka Roster System ym yaklam ya ka Reservation Policy.
