May 18, 2023
U President ka UDP, u Metbah Lyngdoh hawa yaklam wa kiwa thoh khubor ynne ka sngi hadien ka yalang wa da khut da ka sorkar MDA-II ya waroh ki MLA wa em hapoh yong ka sorkar yow pynche yei rukom pynkrehkaam ka Roster System hawa bhah kreh katkam ka Reservation Policy, da ong u wa dang em boon kiwa daw hap yaklam.
Da ong u leh wa neiliang ka Party da dep yachem ko ar sien le sien hajrong kani ka jooh ka phang wei da sñiaw ki wa emkaam chooh i ya chong ya tai wa ka sorkar wei ymtoh wow chim ya kawon kawon ka rai kawa toh neibynta i bha i miat yong kiwa chong chnong ka jylla Meghalaya ya katni chooh.
Da kdaw u leh wa daw em chooh ka yalang myntep ka sngi kawa daw khutlang ya waroh ki Party wei daw em leh i yachem wa waroh ki seiñbhalang, kiwa pynlai chnong wa kiwa yahkhmat niam wei ngait skem u wa ka sorkar daw e ko yei batai kawa daw pynsñiawthooh yei rukom pynkrehkaam ya kani ka Roster System.
Kamtæ da ong u wa ka Party sñiaw ko wa dang emkaam u yachem chooh chooh yow yaklam ya tai hajrong ini neibynta kani ka phang wa emkaam bha yong ka jylla.
