Wai ka Jowai Municipal Board ya ka mala wa thymme ka yung krehkaam

Ka Jowai Municipal Board ynne ka sngi da wai ko mala wa thymme ka yung krehkaam yong ka kawa dang dep chna ko hei lut wa da mang T. 55 lak lyngba ka Grant-in-Aid (Creation of Capital Asset) yong u snem 2021-2022.

Ya kani ka mala wa thymme namo ka First Floor da wan wai da u MLA ka Jowai, u Wailadmiki Shylla uwa man leh u Chairman ka Meghalaya Urban Development Authority chirup i emlang ki MDC ka JHADC, u O. Lamin, u Eveningstar Teron wa u Ailad Bhoi, neitæ ki waheh chnong waphær waphær ka Jowai wa kiwi kiwi.

Ha ka yalang wa pynlai da ka CEO ka Jowai Municipal Board, ka D.V. Lyngdoh, MCS neiliang u Chairman yong kani ka Board, u L.D. Lakiang da pynsñiaw u yei lai luti Municipal wa kamjooh ki Scheme waphær waphær neibynta i myntoi ki paidbah i wym jooh bna ki nachwa.

U Wailadmiki Shylla hawa klam kam u kongsan ong u, “Kamwa jooh ong ka ktien hawa kwah u yoo ya iwon iwon i kylla emkaam u sdang chwa na yung, man i kamjooh hi ya Jowai Municipal Board wa hachwa u pynkylla yei rukom krehkaam emkaam u pyntoh pynbiang chwa ya kani ka yung krehkaam.”

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Ong haroh u wa lada kyruiñ cha ki snem chadien yoo i wa hanla em ka yung krehkaam leh wym em won yoo yei lai chakhmat i krehkaam yong ka, heiwa najrong wa duna ki wakreh i yoh tulop ki leh ym tikna.

Kamtæ hadien wa man u kam uwa mihkhmat da booddien u yei eh i khoo neibynta u pynkhai-im biang ya kani ka yung krehkaam, wei kamwa man kattæ ong u han lym pu yoh thaw noh jhep wa paka leh yooluti u wym slem de neibhah wa ki kaam da lai ki chakhmat.

Khana haroh u wa hei lai luti yong oo najrong kiwa boon ki kaam wa kani ka yung krehkaam da leh ko neibynta i myntoi ki paidbah, da dep pynbiang haroh ko ya ki Truck kit jhep, ka JCB, ka kari wow pynyakhlaad ya ki jait jhep na kiwa pyut wa ki wym pyut, wei da pyrkhat haroh ki sa kiwi de ki bynta wa rap bha chooh chooh.

Kamtæ yow ye u pynmankaam ya waroh i angnood neibynta i bha, kyntu u ya ki paidbah nadooh kiwa yahkhmat chnong, ki seiñbhalang ki sahep sorkar, ki chnat krehkaam waphær wow ya krehlang ki neibynta iwon iwon i bha yong waroh lang.