Hadien wa em du uwi donhi uwa napoh ka jylla Meghalaya uwa da lait ya ka Civil Service Exam 2022 wa da pynman da ka Union Public Service Commission (UPSC) heiwa ya ka Result da pynbna ha ka 23 tarik uni u bnai, neiliang u Montri ka chnat puræ puthi, u Rakkam Sangma ynne da ong u wa ye u man neidaw wym biang ki Coaching Centre wa biang wei boi ka puræ puthi wa da e hapoh ka jylla leh ye u man ka wym ye u pynmih ya ki IAS wa ki IPS.
Kam wow pynkynmoo wa napoh ka jylla du u Swapnil Bhattacharya wa da lait ya kani ka Exam deiwa yoh ya ka kyrdan wa 344 hapoh ka ri.
La chiphaw snem kattu ym em dei ki jaitbru ri-loom kiwa napoh ka Meghalaya wa da ye u pyndep ya ka Civil Service Exam heiwa kawa khaddooh toh ka Isawanda Laloo kawa da ye wow leh yeini ha u snem 2013.
“I ki jaitbru ri-loom em hi i ka sap wei man i leh kiwa pnah bha ha ki yalehke Sport tangwa ym em wa ye u mihkhmat ya ka jylla ha ka World Cup lada ha ka Cricket lane ka bol, iyi i daw? Wym biang i ya ki thaw yalehke,” da ong u Montri.
Hajrong kani ka nongmuna da ong u wa ye u man wa ka puræ puthi yong i ym em biang kyrdan ko hawa nujor wa kiwi wei ka sorkar daw pait ko ya ini yow thooh ki laad u pynbha pynmiat.
Heijooh i por da ong u wa ym em tlot ym em kom i, tangwa em bait iwa dang ye wow pynbha pynpliah deiwa e khublei leh ya u Swapnil Bhattacharya wa kiwi ki 19 ngut kiwa na ka jylla North East kiwa da ye wow jop ya kani ka Exam.
Ha iwi won i liang da beiñ u ya ka Voice of the People Party (VPP) deiwa ong heithaw wow leh Politics, toh u thooh laad kammon u pynku ya ka puræ puthi, u pynmih ki kreh wa boon wei wow pyndap ya kiwa dang thylli heithaw wow phah pynsangeh yei thung kreh iwa man pyrchah yei angnood ki khynroo khyllood ki wym em kreh.
Ha ka Result ka Civil Service Exam wa dang dep pynbna da em 6 ngut kiwa na Assam, mar soo ngut na Nagaland wa Manipur, le ngut na Arunachal Pradesh wa mar samen na Sikkim, Tripura wa Meghalaya kiwa lait ya kani ka Exam.
Puræ leh: Palat 11 lak ngut kiwa thap pyrtuid yow yaleh Civil Service Exam, 933 ngut wa cha jied
