Hadien wa ki pulit ka East Khasi Hills District da yoh ujor ki ha ka 16 tarik uni u bnai wa em uwi u bru wa kam toh u IB Officer ka Ministry of Home Affairs ka sorkar India, uwa da tyrwa kreh ya ki bru hapoh Secretariat, Shillong lyngba ka MPSC wa DSC deiwa paan poisa wei da em uwi u bru uwa da ngait yeini wei da e u hadooh T. 80 lak kawa da lai paan yarap u na 38 ngut ha chi snem tangwa uni uwa kular kreh da wiar noh u.
Ki pulit da yoh ki sa kawi ka FIR ha Lumdiengjri Police Station ha ka 22 tarik uni u bnai wa uni u jooh u bru da kam u wa oo toh u sahep ka Police Special Branch wei da kular u wow e kreh hapoh ka chnat pulit lada su u T. 1 lak neibynta ki kreh ki wym pu pyndep matric wa T. 50,000 ya kiwa da pyndep matric, kamtæ da em uwi wa da e kti T. 50,000 cha uni u bru lyngba uwa yah kari u ha Motphran, Shillong ha u Wisu (Mar) uni u snem.
Kamtæ ha kani ka takit wa da leh da ka Mawlai Police Station waka Lumdiengjri Police Station da kem ya uwi u bru wa tip kam u Richard Tiplang (39 snem) uwa da kam wa oo toh u IB Officer wei da rah ya oo hakhmat ka yung bichaar.
Da kem leh ya kawi ka kari Bolero wa em Number ML-05Z-3007 kawa em leh ya ka Siren wa ki VIP Blinker, kawi ka Mobile Phone, ka Laptop wa kiwi ki kot ki sla kam ki sabut na yung uni u bru wa em ha Wahingdoh.
Ki pulit da kyntu ki ya ki paidbah wa lada em kiwon kiwon kiwa chah thok ha ki bru wow ujor FIR smat ki ha ki Police Station wa em chajan ki.
