U Dalammi Dauni Rymbai na ka skur KJP Synod Mihsngi Higher Secondary School Jowai uwa da yoh psiah haka thup Top 20 yong ka Result Secondary School Living Certificate (SSLC) 2023 ynne ka sngi deiwa yoh ha ka kyrdan wa 20, da pynsñiaw u yei kmen wei sñiawhun yaka Result wa yoh u najrong wa sñiawngooh u leh ya kiwa sikai, ka bei u pa yong oo kamjooh ki lok kiwa da embynta heiyatoh wa kani ka thong wa yoh u.
Kam ki khynnah skur hi hei puræ puthi ong u iwa biang toh u khrehkot man-ka-sngi kajiak kajiak bar yeitu i puræ syndon da ki boon kynta haka por wa kyndian.
Neiliang ka bei u, ka Treyoriki Rymbai wa u pa u, u Teimiki Marboh da pynsñiaw ki yei sñiawngooh ya kani ka skur ya kani ka thong wa yoh u khon ki.
Ong ki leh wa heiyatoh i krehkot kam ki bei ki pa wymtoh u pynbor ya ki khon, neibhah i mon yong ki hi wow kreh kawa ye u pynmyntoi, wei boonsien deiwa pynbor hi-eh wym em yumut ko ma khreh chooh ki leh.
Neiliang u Vice Principal kani ka skur, u Wanmi Passah da khana u yei rukom man u Dalammi ha kani ka skur wei da man u leh uwi wa da yoh yaka khusnaam Best Student of the Year ha u snem 2022.
Sñiawkmen haroh u yei chaniah wa da e da ki bei ki pa yong oo, kamjooh yong kiwi won ki khynnah wa da lehbha ha kani ka Result deiwa yoh Distinction ha ki Subject waphær waphær.
