Ka Little Star Secondary School, Ladrymbai da pynsñiaw ko yei sñiawngooh ya u Blai kynrad wa da pynmankaam u yei thrang yong ka skur nadooh wa da seiñ ya ka ha u snem 2009 heiwa ha uni u snem 2023 kawi na ki khynnah skur yong kani ka skur, ka Emika S Dkhar ka khon u Marius Siangshai waka (L) Phoidik Dkhar kawa chong wa sah ha Ladrymbai Khliehdupon, da yoh ko ya ka kyrdan wa 17 yong ka Top 20 Merit List ha ka Result SSLC 2023 wa da pynbna da ka MBOSE ha ka 26 tarik uni u bnai.
Kamtæ da pyndap ko da i mynsien wa kmen ya ka skur, ka chnong wa ya ka East Jaiñtia Hills District hi waroh kawi wa da em kam kani ka khynnah wow man kam ka nongmuna ya ki para khynnah wa hawa em i thrang, lyngba i kreh chitom ye i wow poi cha ka thong.
Ka Emika S Dkhar man ko ka khynnah kawa kreh chitom nadooh i por wa dang khynnah wei nadooh wa dang khian da man ko ka khynnah ka wa pdiang ya iwon iwon i eh wow yaleh hadooh wa jop. Jooh mihkhmat ko leh ya ka skur ha ki yakob Debate, Extempore Speech wei kamjooh leh ha ki Science Exhibition kiwa da pynman da ki chnat sorkar wei da jop ko ya kini ki yakob ha kiwa boon ki por wa ka da lai ko wow chimbynta.
Neiliang yong ka skur sñiawtoh ko leh u e khublei ya ka Hanika Shylla ka khon u Richie L Dkhar waka Thiangmon Shylla kawa man kam kawi napyrdi ki 11 ngut kiwa da yoh ya ka Highest Mark ha ka Science & Technology heiwa da yoh ko 100 na 100 ha kani ka Subject.
Kamtæ neiliang yong ka skur sñiawtoh ko u e khublei wei kitbok kitrwiang ya kini ki arngut kiwa da booh yei naam yong ka skur hapyrdi kiwi tawon ki skur kiwa paaw hapoh yong ka jylla yong i wei ngaitskem wa lyngba ka nongmuna wa kini ki arngut da yahluti ki wa neini chakhmat daw mih chiboon ki khynnah ki wow wanrah burom ya ka thaaiñ East Jaiñtia Hills.
