U Montri Rangbah ka jylla, u Conrad Sangma da wanrah u ya ka $10 Billion Economy Vision haphrang ka World Bank ha ka yalang wa pynman ha Meghalaya House, New Delhi. Ha kani ka yalang da em ki heh ka World Bank kam u Augustus Tano Kouame, Country Director, ka Junko Onishi, Lead Social Coordinator, Meghalaya, ka Benedicte, Senior Economist wa u Mohan Gopalakrishnan, Senior Economist. Ya u Conrad da synraan da u Donald P. Wahlang, Chief Secretary, u Sampath Kumar, Development Commissioner wa u Dr. Vijay Kumar D, Commissioner and Secretary.
U Conrad da khana u ya ki kaam wa da pynkreh hapoh jylla kiwa pynku ya i roi i paar wa kamjooh i synchaar. Heiyatoh wa i emkaam ki paidbah katwa wa yah ka juk katni, ka sorkar da pynkreh ko ya ki sarok, i pynpoi umkor wa i chakri ya ki paidbah heiwa kawi na kini toh ka MeghEA, kawa nyngkong ha ka jylla ka ri.
Ka e-Proposal System chimbynta yong ka MeghEA da yoh yaroh wei da yoh khusnaam ko leh ya ka UN-WSIS Award wei ini da wanrah ko ya ka Meghalaya haphrang ka pyrthai.
Katkam wa man katni em 12 tylli ki kreh namo ki Project kiwa da yoh yarap poisa na kiwi ki ri kiwa da pynkreh ha ka jylla wei em sa 11 tylli kiwa daw pynkreh. Kini waroh da kynjoh ki T. 10,000 klur kiwa da yoh yarap na baar ri heiwa na ini T. 2400 klur da yoh na ka World Bank.
Kiwi ki Project wa da pynkreh nei yarap ka World Bank toh ka Meghalaya Integrated Transport Project (MITP), Meghalaya Community Led Landscape Management Project (CLLMP), Meghalaya Health Systems Strengthening Project (MHSSP), Meghalaya Programme for Adolescent Wellbeing, Employment and Resilience (MPOWER).
Ki heh ka World Bank da sñiawkmen ki wei da yaroh ki ya ka Meghalaya heiyatoh wa ki kreh wa da leh ko wei da kular ko leh wow yarap ya ka ha ki Project wa daw wan. Kini ki Project toh kiwa emkaam bha wow pynman ya ka jylla kam ka $10 Billion Economy. Heiyatoh wa ini, ka jylla da kreh bha ko wow chakri ya ki paidbah deiwa e nongmuna ya ka Enhancing Governance & Service Delivery Capabilities kawa $60 Million.
U Chief Secretary ka Meghalaya, u Donald P. Wahlang da ong u wa ini i kyrchaan ka World Bank da ye wow wanrah ya ki kaam pynroi wei daw ye u pynman ya ka kam ka luti pynman khayi pateiñ namo ka Economic Corridor ya ka thaaiñ mihsngi.
Neiliang u Conrad K Sangma da ong u wa Auguste Tano Kouame uwa man u Country Director ka World Bank, wa ki heh yong ka da kular ki wow krehlang ha ka Enhancing Governance & Service Delivery Capabilities Project ha Meghalaya neibhah ka sorkar pynyoo ko wow raikut u chakri ya ki paidbah.
