Ka Chairperson yong ka Committee wa da thung da ka sorkar hajrong ka ‘Reservation Roster’, ka Dr. Mazel Ampareen Lyngdoh da ong ko wa ka Committee da paan bor ko na ka sorkar wow pynyaar yeiwa yaklam ka Committee, deiwa kynthup lang yei yaklam hajrong i bhah kreh namo Job Reservation Policy.
Kani ka Committee hajrong ka Reservation Roster da chong ko ya ka yalang wa nyngkong ynne ka sngi heiwa waroh kiwa mihkhmat na ki seiñ saiñpyrthai kiwa da chah jied da poi ki wow yaklam sani wei wow tyrwa yei buit wa i e yumut, laitnoh ka Voice of the People Party (VPP) wa da jied ya u Ardent Basaiawmoit wow man kam u dkhot ka Committee u wym em wan cha ka yalang hajrong i dawa wa toh u pynthymme chwa ya ka Reservation Policy.
Hawa klam hadien ka yalang, ka Ampareen da ong ko wa ka ‘Roster System’ wa ka sorkar da pynkhreh ko neibynta wow pynkrehkaam ya ka ‘Reservation Policy’ da dep wow sñiawthooh da ki seiñ saiñpyrthai wei ki leh da e yumut ki kammon wow pynbha chooh chooh ya ka Roster.
Da ong ko wa neiliang ka Committee sñiaw ko wa toh u e laad lang ya waroh ki seiñ kiwa em ha ka jylla wow yaklam, wei da toh i por wow e yumut ya ka sorkar wow chah ya ka Committee u e laad ya ka VPP wow pynsñiawthooh yei emkaam wow pynthymme ya ka State Job Reservation Policy.
Ka Chairperson kawa man leh ka Montri wa pait ya ka Kaam Aiñ da ong ko wa ki seiñ saiñpyrthai kiwa da poi cha ka Committee ym em yaklam ki du chaphang ka Roster, tangwa da yaklam leh ya ka Reservation Policy, neibhah ka Reservation Policy toh i tre katwa ka Roster toh du wow pynlai ya ka Reservation Policy, wei emkaam wow wai laad ya waroh ki seiñ saiñpyrthai wow embynta lang neibhah ym ye u yaklam du ya ka Roster khlem da yaklam ya ka Reservation Policy.
Puræ leh: Pynbna ka sorkar ya ki dkhot ka Committee ki wow pynbait khaddooh yei krehkaam ka Roster
