Hadien wa ini wa dep da pynman ka sorkar Meghalaya yei pynche hakhmat ki seiñ saiñ pyrthai ka jylla hajrong i krehkaam ka Roster wei da pynbna leh wow dam chwa wow pynbna yei lait kreh thymme kat wym pu dep ka Committee wow thooh bniah chooh chooh yei rukom pynkrehkaam ya kani ka Roster System.
Neiliang ka chnat Home (Political) Department ka sorkar Meghalaya ynnin da pynbna ko ya ki dkhot kani ka Committee kiwa kynthuplang wa ki dkhot ki seiñ saiñ hima ki wow yaklam ya phyllu yei pynkrehkaam ya ka Reservation Roster System wei ya kini ki pyrtuid da mynjur da u Lat ka jylla.
Ki kyndon wow krehkaam kani ka Committee toh wow pynbait khaddooh yei pynkrehkaam ya ka Reservation Roster wei wow phah cha ka sorkar yeini wa da ya mynjur ki hapoh 15 sngi nadooh wa da pynbna ya kani ka Committee.
Ki dkhot kani ka Committee man ki kamni ha wah:
- Dr. M. Ampareen Lyngdoh, Law Minister kam ka Chairperson.
- U Zenith M. Sangma, AITC kam u dkhot
- U H.M. Shangpliang, BJP kam u dkhot
- U Augustine Marak, GNC kam u dkhot
- U Methodius Dkhar, HSPDP kam u dkhot
- U Ronnie V. Lyngdoh, INC kam u dkhot
- U Pyndapborthiaw Saibon, KHNAM kam u dkhot
- U Dr. W. Kharlukhi, NPP kam u dkhot
- U Renikton Lyngdoh Tongkhar, UDP kam u dkhot
- U Ardent M. Basaiawmoit, VPP kam u dkhot
- U Chief Secretary, sorkar Meghalaya kam u dkhot
- Commissioner & Secretary/ Secretary, Personnel & A.R. (B) Department kam u Member Secretary
Ka sorkar da pynbna ko leh ya ka 31 tarik uni u bnai kam ka sngi wow khut sa ya ki seiñbhalang, kiwa yahkhmat chnong, kiwa yahkhmat niam yow wan ki cha ka yalang pynsñiawthooh hajrong i pynkrehkaam ya ka Reservation Roster wa daw pynman hiepor 11:30 i step ha Auditorium Hall ka Yojana Bhavan, Meghalaya Secretariat.
