Ka sorkar jylla lyngba ka Deputy Commissioner yong ka East Khasi Hills, ka R.M. Kurbah da pynmih ya ka hukum wow pynlai biang da ki Odd/Even Number ya ki kari kamai ha nongbah Shillong, ka wow krehkaam nadooh ka 5 tarik uni u bnai kam chibynta wow kdoh u khoom yei khynnia wei sahkut kari.
Ya kani ka hukum da pynmih da ka Deputy Commissioner ynne ka 1 tarik kawa man kam wow pynkrehkaam ya ka hukum ka Meghalaya High Court kawa da pynmih ha ka 16-12-2021 wa ha ka 11 tarik u Naisan uni u snem kawa da phah ya ka sorkar wow wanrah ya ki laad ki luti wow pynduna yei khynnia ki surok ha Shillong.
Ka Deputy Commissioner da pyntip ko wa kani ka hukum Odd Even Number u krehkaam du ya ki kari kamai (SPTS Bus, SSPTS- Maxi Cab, ki Taxi rong yong rong stem) kiwa lai na Kashari Point cheiliang Police Bazaar wa Motphran.
Ka Deputy Commissioner da pyntip ko wa ki kari wa em ya ka Odd Number (1,3,5,7,9) toh u lai ha ka sngi Monday, Wednesday wa Friday katwa kiwa em ya ki Even Number (0,2,4,6,8) u lai ki du ha ka sngi Tuesday, Thursday wa Saturday. Da pyntip wa kani ym krehkaam ko ha ka sngi Sunday.
Najrong ini, ka Deputy Commissioner da pyntip ko wa waroh ki kari toh u em ki ya ka High Security Registration Plate (HSRP) wei toh u em ki leh ya ki Registration Certificate hawa em i sylli kot kari ha iwon iwon i por. Lada chem kiwa pynemkaam da ki Number Plate kiwa da dep pynchna deiwi daw chah pynchitom katkam ka aiñ wei daw chah knieh leh ka License yah kari.
