Dei pynsñiawthooh wei thung dieñ ha Khloo Langdoh pynman ka KCC Seiñraij Jowai ha ka World Environment Day

Ka Khynroo Khyllood Committee Seinraij Jowai hajrong ka phang yong ka World Environment Day 2023 ha ka 5 tarik ha Yungwalieh ka Chilliangraij da pynman ko ka yaklam pynche pynsñiawthooh ya ki khynnah skur ha ka mat kyrpang wa ong “Beat Plastic Pollution with Special Reference to the Impact on Jowai Town” heiwa ka bru stat bru chemphang ha kani ka sngi toh ka Nilamroi Passah, Senior Secretary Martin Luther Christian University Shillong.

Kani toh ka yalang wa da pynman dei yakrehlang ka Khynroo Khyllood Committee, Seinraij waka YESS Meghalaya wei ha ka yalang yahkhmat yong kani ka sngi hei pynlai u Rangbahmi Kynjing, Chairman KKC Seinraij da yoh i ngoohblai ngoohsyiem na u Kamnipaia Challam katwa ki kyntien e mynsien wa ki kyntien kyrsu kyntu ya waroh kiwa embynta ha kani ka yalang da klam da pynsñiaw na u O.R. Challam, President Seiñraij Jowai wa u Arwotki Sumer, General Secretary Seiñraij katwa u Sienmi Lato, Secretary KKC Seiñraij hawa kut da e u ki kyntien sñiawngooh.

Ka Khynroo Khyllood Committee Seinraij ha ka thong wow khriñ yei pyrkhat pyrdaiñ ki khynnah skur heiyatoh wei man i long ka bei rym-aw ha kini ki sngi wa katni da pynyoo ko leh ya kawi ka phlim Documentary wa tbian kawa pynyoo yei man i long ka bei rym-aw ha kini ki sngi neidaw i wym tip ki bru pyrthai u kheiñkor u makhane yei kyrkhu yong ka.

Ka Nilamroi Passah, kam ka bru stat bru puræ bniah yei man ka bei rym-aw da ong ko ha ki por wa da lai ym jooh hap u yaklam ya ka Plastic Pollution, katwa ha kini ki kajiak snem ka United Nation hap chimkhia bha ko wow yaklam chaphang ka Plastic Pollution neibhah yoo ko wa ka Plastic man bih man kjut ko ym du kat ya ka bei rym-aw wot ya waroh kiwa im. Kamtæ deiwa pynman ya kani ka pynsñiawthooh u yarap ko wow pynche pynsñiawthooh ya ki khynnah skur kamjooh ya kiwa chong chnong ka Jowai chaphang kammon u yait nei pynemkaam ya ka Plastic wei iyi i kyrkhu wei myntoi u yoh lada kut yumut i wow sangeh nei pynemkaam ya ka Plastic wei yada sumaar i ya ka bei rym-aw wa ki soodong sookun yong ka.

Related posts

I pynbna wa emkaam neibynta kiwa kwah u chimbynta ha ka 1st Miss Latuber Beauty Contest 2024

November 21, 2024

Chem uwa lai puræ PhD uwa na Nongjngi ya ka dakha wa thymme ha Lakroh

November 20, 2024

Chooh chooh ha kani ka sngi ka Khynroo Khyllood Committee Seiñraij dei chimbyntalang ki khynnah skur ka Chilliangraij SSA UPS, Chilliangraij Govt. LPS, Loompyrdi Iongpiah UPS SSA, Dulong Govt. LPS, Pohmusiang UPS SSA, Government Girls Hr. Secondary School, Jowai wa ka Panaliar UPS SSA deilang ki waheh wasian ka Seiñraij Jowai da pynman ko i thung dieñ ha ki bynta ka Khloo Langdoh.