U Montri wa pait ya ka chnat Social Welfare, u Paul Lyngdoh da ong u wa i chah pynbaad yei pynemkaam bakla ya u khoo rachon “Rice Scam” toh ka wym em yurim wei ym em leh iyi iyi iwa sakhiat.
Hawa kyntait yeini, u Paul Lyngdoh da ong u wa u Account General (AG) ka Meghalaya da klam che bha u yeiwa da dep jubab ka sorkar wei neiliang ka yung krehkaam u AG leh da kdaw ko wa hei chem yong ki ini i pynbaad ymem kjat i wow yieñ kamtæ ym ye wow ong wa toh ka “Scam”.
“Hadien wa da ap yeiwa da khana ka Law Department, u Advocate General wei hadien wa da dep pait bniah yeiwa da jia kamjooh i takit ki pulit iwa da pynslem neidaw wym biang i ya krehlang wa ki pulit ka Assam heiwa ini da jia i ha Assam. Nga da chem O wa neini chakhmat toh u booh dei por yow pyndep ya kam kini ki takit yow lait ki chnat u chah taan hi-eh khlem daw ha kam kini ki jait chah pynbaad”, da ong u Paul.
Kam wow pynkynmoo wa ha u 2021, ki pulit ka Assam da kem ki 1 lak tylli ki churia khoo na kawi ka kudam ki bru samen ha Boko, Kamrup District, Assam. Kawi ka churia toh kawa khia 50 Kilo u khoo wei da pynbaad wa heini da pynemkaam bakla ya u khoo rachon wa da poi i lut da ki klur tangka wei da emkti lang da ka Food Corporation of India (FCI), Shillong.
Tangwa hadien wa mih khubor ini wa jia, neiliang ka sorkar Meghalaya da saitkti ko yeini heiwa u Montri Rangbah, u Conrad K Sangma da ong u wa ini wa jia ymem yatoh i iyi iyi waka Public Distribution System (PDS) ha Meghalaya. Da ong u leh wa katkam ka Report wa da pyntip dei ktien, ka jylla da yoh ko yei bhah u khoo rachon (PDS Rice) hapoh ka aiñ National Food Security Act, 2013 neibynta u Naisan wa Naiynru uwa dapoi chwa neibynta kini ki bnai. Chooh chooh da ong u wa lada wiar kat deini sang u khoo daw tip lut da waroh.
