Ka High Court ka Meghalaya ynnin ka sngi da kyntait ko wow tynyap ya ka hukum phah kset ya uwi u bru 15 snem uwa da salitbor ya uwi u khynnah uwa dang 9 snem ha Shillong.
Uni uwa da chah kset da booh kyrpaad u hakhmat ka High Court deiwa ong wa ym em chah bichaar u dei hok heiwa da ap du yeiwa khana donhi u khynnah wa da pynbaad wa chah slaitbor katwa kiwi kiwa ye u man kam kiwa sakhi ym em wan khut ya ki wow wan ki chakhmat.
Ini toh iwa da sdang hadien wa u pa uni u khynnah da e FIR u ha ka 10-04-2017 ha ka Pasteur Beat House, Shillong hajrong iwa da jia ya u khon u uwa dang 9 snem uwa lai Class-III wa da chah slaitbor u ha uwa lai Tuition u.
Katkam kani ka FIR hadien wa ka bei uni u khynnah phah lai Tuition ko ya oo tangwa ym bien u wow lai heiwa da khana u wa uwa chim Tuition hadien wa kut Tuition da phah chong slem u oo wei da slaitbor u oo.
Uni u khynnah da khana u leh hakhmat ki pulit wa uni uwa chim Tuition da leh u boon kiwi ki kaam wa poh wei da kdoh u leh yei kti da ka that lumar wei da tymmoh u yei ktien dei kti heipor wa slaitbor u oo.
Ha ini i lai Tuition da em leh sa uwi u khynnah uwa tip hi-eh u kam u Babuji.
Nyngkong ka bei uni u khynnah ym em ngait ko yeiwa khana u khon ko wa kut u lai Tuition u da jia ma jia ini wei uni uwa chim Tuition leh da maham wei dat u oo uni u khynnah lada khana u yeini cha uwon uwon. Wei da khana u cha ka bei u hadien wa da jhia wei da kjut ware i bynta wa chah slaitbor u.
Ya uni u khynnah da lai yah cha Ganesh Das Hospital ha ka jooh ka janmiet wa e FIR heiwa da pyntikna wa chah slaitbor u.
Uni u khynnah da khana u wa chwa wow chah slaitbor u ha ka 08-04-2017, la ar bnai da chah tba kti khlemakor u ha uni u bru.
Uni uwa chim Tuition ha i kyrpaad wa da booh u hakhmat ka High Court da ong u wa uni u khynnah da kam u wa lai Tuition u nadooh 5:00 waje i janmiet hadooh 9:30 i miet tangwa ya ka Tuirion da sdang du heipor 8:00 waje i miet. Wei lada jia ini waroh, uwi won u khynnah wa lai Tuition uwa tip kam u Babuji ym em lai takit ya oo da ki pulit wei ym em leh wanrah ya oo heipor wa pynman yei bichaar.
Wei da ong u leh wa uni u khynnah ym em ong wa lada ya u Babuji da phah liwan chwa wow jia iwa jia ya oo wei ini toh iwa emkaam u tip na u Babuji.
Chooh chooh da ong u wa oo chim Tuition u nadooh 8:00 waje i miet tangwa uni u khynnah won da ong u wa lai Tuition u nadooh 5:00 waje i janmiet wei ka takit ym em chimkhia ko yeini.
Tangwa ka High Court hawa e yei jubab da ong ko wa du deiwa khana u khynnah yeiwa jia ya oo kamjooh ka Medical Report da biang wow phah kset ya uni u bru hanla ym em khut ya u Babuji kam uwi na kiwa sakhi wei lada i por lai Tuition ye u man wa pynjrong da u pa uni u khynnah tangwa ym ye wow kyntait yeiwa da khana uni u khynnah deiwa smai hapoh ka Section 164 ka Code of Criminal Procedure, 1973 kamjooh yeiwa chem heipor wa leh ya ka Medical Examination.
Chooh chooh ka High Court da ong ko wa uni u bru ymye u wow len wym em leh u ya ini i kaam, kamtæ ka hukum wa da rai wow kset ya uni u bru 15 snem deilang waka kuna kawa T. 1 lak u neh ko kamjooh hi.
Ka High Court da ong ko leh wa ki bru wa leh ya kam kini ki kaam ym leh ki deiwa yoo ki bru kamtæ i kwah wow khut ya ki bru wa sakhi toh i wym ye u man wei ki khynnah khian ym ye ki wow wan hi-eh chakhmat wow chna kam kini ki parom wa jia ya ki.
Kam wow kdaw wa ya uni u bru da dep rai pynrem wei phah kset ha ka 30-09-22.
