Ka 1st FKJGP Lama Unit 7-A-Side Football Tournament 2023 wa pynlai da ka FKJGP Lama Unit dapoi ko cha wakut ynnin ka sngi heiwa da wan pynhaap pyrda ya ka da u Kitboklang Nongphlang, Vice President FKJGP Central Body kam u kongsan hei synraanlang ki dkhot ka seiñ na Shillong. Da emlang u MC Suting uwa man kam u President FKJGP East Jaiñtia Hills District Khliehriat kamjooh u General Secretary u D.H. Sumer wa kiwi de kiwa kitkaam yong ka District.
Ya ka yalang da pynlai da u Lamchwa Dong, President FKJGP Lama Unit wei da yoh yei klam wai phang na u Haniel Syrti, General Secretary ka FKJGP Lama Unit.
Neiliang yong ka chnong da yoh i klam na u Mission Syrti uwa da ong wa ka chnong da yoh ko wow sakhi yei kaam wa bha wa ka FKJGP Lama Unit da leh ko hanla ym pu em slem wa em ko hapoh ka chnong Lama, kamtæ da kyntu joor u wow nang kreh chitom chooh chooh kiwa yahkhmat ka seiñ khnang wow yoh ka chnong yei myntoi.
U kongsan hei klam yong oo da ong u wa ka FKJGP em ko ya ka yurim wa skem wow chakri ya ki paidbah wot hapyrdi i eh wa ya tyngkhooh ko. Kamtæ da khut da wer u ya ki khynroo wow chakri dei mynsien wa chynrang da u dohnood wa pai phang da i jabieñ wym em sah sarah.
Da yaroh u leh ya ka FKJGP Lama Unit wa da chim ko ya kani ka rai wow pynman ya kani ka lympung yalehbol heiwa da ong u wa i yalehbol ymtoh ka kaam yaleh bang-ja tangwa da man ko ka pliang-ja ki khynroo kiwa em i sap i tap. Chooh chooh da ong u wa em le tylli i myntoi wa yoh ki khynroo nei yalehbol iwa kynthup yei chait i khiah i doh i pran, i khlan i bor pyrkhat kamjooh i sikai wow em i ya krehlang wa kiwi.
Yei naam jop yong kani ka lympung da yoh rah da ka Nangkiew Youth FC deiwa yachut Tie-Breaker pyrchah ya ka Dong FC.
Kamtæ kawa jop da yoh ko ya ka song poisa wa T. 20,000 deilang waka Trophy katwa kawa rem won da yo yoh ko T. 10,000 waka Trophy.
