Ka sorkar jylla da pynbna ko wa da tipmit ya 7 tylli ki District hapoh ka Meghalaya kam ki thaw wa joor bha kiwa dih drugs kiwa da ku cha wa palat.
Hawa pyntip yeini, neiliang u Montri wa pait ya ka chnat Social Welfare, u Paul Lyngdoh da pyntip u wa ki 7 tylli ki District toh kiwa kynthup ya ka East Khasi Hills, West Jaiñtia Hills, East Jaiñtia Hills, West Khasi Hills, Ri Bhoi, West Garo Hills wa South Garo Hills wei da khana u leh ya ki chnong wa ki dong wa boon kiwa pynemkaam drugs.
Da ong u wa ha East Khasi Hills ki chnong wa ki dong wa da man kam ki “Hot Spots” kynthup ki ya ka Madanriting, Jhalupara, Nongthymmai, Polo, Nongmensong, Mawlai, Mawprem Lumdiengjri, Iew Mawlong, Mawngap, Mawrygnkneng wa Pynursla.
Chooh chooh da ong u wa ka sorkar da pynkhreh ko wow yaleh thma pyrchah ini wow pyndooh jait syndon yei drugs, kiwa khayi drugs deiwa pyrkhat hadooh katwon da ktah ko ya ka imlang sahlang.
Da kdaw u leh yeiwa da chem ka sorkar nadooh u snem 2018 wei hadooh katni won da ku da boon bha kiwa pynemkaam drugs wei daw thooh bniah bha yow tip che wa ini toh iwa tikna.
Ka sorkar hapoh ka ‘DREAM’ wa mut Drug Reduction Elimination and Action Mission toh ka thong wa da booh ka sorkar wow pynlait ya ka Meghalaya nei drugs deiwa e ya ka rynsan kawa man Online wa Offline yow wan pyntipmit kiwa pynemkaam drugs tangwa deiwa murieh yei pytuid ki yow tip deiwa tikna katwon ngut em kiwa pynemkaam drugs.
U Montri da khana u leh wa ka sorkar e kyrchaan ko ya ki De-Addiction Centre yow ye ki wow e yarap deiwa mynkna cha kiwa wan phah sumaar.
Da khana u wa kini ki thaw toh ka Break Through Centre, Khliehtyrshi, Kripa Foundation, KJPA New Life De-Addiction Centre, New Hope De-Addiction Centre, Shillong waka KJPA Selda ha Nongstoin wei daw chna leh sa le tylli ki De-Addiction Centre ha ki le tylli kiwi ki District wei daw chim rai ha kiwon ki District.
Heiyatoh won wa ki pulit, da ong u wa daw hap wow pynkhlan ya ki Narcotic Cell kiwa da em le ngut ki pulit.
Da pyntip u leh wa da rai wow pynboon ya ki bru wow pait ya ini i kaam ha waroh ki District yow ye ki wow kdoh u khoom ya ini kaam wei ym ieh ya iwon iwon wa emkaam u leh yow jop ya ini i wei u kreh kamwa lai yaleh thma hadooh wow pynkylla ya ka aiñ yow lait kiwa pynemkaam u lait suk na ki kti ka aiñ.
